ഇറ്റാനഗർ: അരുണാചൽ പ്രദേശിലുണ്ടായ ഹെലികോപ്റ്റർ അപകടത്തിൽ കരസേനാ ഉദ്യോഗസ്ഥരായ പൈലറ്റുമാർക്ക് വീരമൃത്യു. മണ്ടല മലനിരകളിൽ വച്ച് കരസേനയുടെ ചീറ്റാ ഹെലികോപ്റ്ററായിരുന്നു തകർന്ന് വീണത്. സംഭവത്തിന് പിന്നാലെ ഇന്ത്യൻ സൈന്യവും സശാസ്ത്ര സീമാ ബാൽ ഉദ്യോഗസ്ഥരും പോലീസും സംയുക്ത തിരച്ചിൽ നടത്തിയിരുന്നു. പരിശോധനയ്ക്ക് ഒടുവിലാണ് രണ്ട് പൈലറ്റുമാരെയും മരിച്ച നിലയിൽ കണ്ടെത്തിയത്.
ലഫ്. കേണലും മേജറുമാണ് കോപ്റ്ററിലുണ്ടായിരുന്നതെന്നാണ് റിപ്പോർട്ട്. വ്യാഴാഴ്ച രാവിലെ 9.15ഓടെയാണ് ഹെലികോപ്റ്ററിന് എയർ ട്രാഫിക് കൺട്രോളറുമായുള്ള ബന്ധം നഷ്ടപ്പെട്ടത്. അരുണാചലിലെ ബോംദിലയുടെ പടിഞ്ഞാറ് ഭാഗത്തുള്ള മണ്ടലയ്ക്ക് സമീപം കോപ്റ്റർ തകർന്ന് വീഴുകയായിരുന്നു. 12.30-ഓടെയാണ് തകർന്ന് കിടക്കുന്ന ഹെലികോപ്റ്ററിന്റെ അവശിഷ്ടങ്ങൾ പ്രദേശവാസികൾ കണ്ടെത്തിയത്. തുടർന്ന് പോലീസിനെ വിവരമറിയിക്കുകയും സൈന്യമെത്തി തിരച്ചിൽ നടത്തുകയും ചെയ്തു. മോശം കാലാവസ്ഥ മൂലമാണ് അപകടമുണ്ടായതെന്നാണ് പ്രാഥമിക നിഗമനം.
