ആർമി മെഡിക്കൽ വിഭാഗത്തിന്‌റെ സ്ഥാപകദിനം; മാരത്തോൺ നടത്തം സംഘടിപ്പിച്ച് ആർമി സൈനിക ഡോക്ടർമാർ

ന്യൂഡൽഹി: ആർമി മെഡിക്കൽ വിഭാഗത്തിന്‌റെ 259-ാമത് സ്ഥാപക ദിനത്തോടനുബന്ധിച്ച് നടക്കുന്ന ആഘോഷ പരിപാടികളുടെ ഭാഗമായി ഡൽഹി കരിയപ്പ പരേഡ് ഗ്രൗണ്ടിൽ സൈനിക ഡോക്ടർമാരുടെയും കുടുംബാഗങ്ങളുടെയും നേതൃത്വത്തിൽ മാരത്തോൺ നടത്തം സംഘടിപ്പിച്ചു. മെഡിക്കൽ സർവീസസ് ലെഫ്‌നന്‌റ് ജനറൽ ദൽജിത് സിംഗ് പരിപാടി ഫ്‌ളാഗ് ഓഫ് ചെയ്തു.

എല്ലാ വർഷവും ഏപ്രിൽ 3-ാം തീയതിയാണ് ആർമി മെഡിക്കൽ വിഭാഗത്തിന്‌റെ സ്ഥാപകദിനം ആഘോഷിക്കുന്നത്. അതിനു മുന്നോടിയായാണ് മാരത്തോൺ നടത്തം സംഘടിപ്പിച്ചത്. പ്രതിരോധ മേഖലയിലെ മുതിർന്ന ഉദ്യോഗസ്ഥരടക്കം പരിപാടിയിൽ പങ്കെടുത്തു.

സുരക്ഷാ സേനാംഗങ്ങളുടെ ആരോഗ്യം സംരക്ഷിക്കുന്നതിനും ദുരന്ത മേഖലകളിൽ യുഎൻ നടത്തുന്ന പ്രവർത്തനങ്ങൾക്ക് മികച്ച ചികിത്സ സൗകര്യങ്ങൾ ഒരുക്കുന്നതിനും ഇന്ത്യൻ മെഡിക്കൽ സേനയ്‌ക്ക് കഴിയുന്നുണ്ട്. സർവ്വരും രോഗങ്ങളിൽ നിന്നും വൈകല്യങ്ങളിൽ നിന്നും മോചനം നേടട്ടെ എന്ന് അർത്ഥം വരുന്ന ‘സർവ സന്തു നിരാമയ’ എന്ന തത്വമാണ് ഇന്ത്യൻ മെഡിക്കൽ വിഭാഗത്തിന്‌റേത് എന്ന് ജനറൽ ദൽജിത്ത് സിംഗ് പറഞ്ഞു.