മലയാളതാരങ്ങൾപ്പം അഭിനയിക്കുമ്പോൾ തോന്നുന്നത് ആക്ടിങ് സ്കൂളിൽ പോകുന്നതുപോലെ; ഭൂരിഭാ​ഗം നടന്മാർക്കും അസാമാന്യ കഴിവുണ്ട്: സാമന്ത

മലയാള സിനിമാ താരങ്ങൾക്കൊപ്പം അഭിനയിക്കുമ്പോൾ ആക്ടിങ് സ്കൂളിൽ പോകുന്നതുപോലെയാണെന്ന് നടി സാമന്ത. മലയാളത്തിലെ ഭൂരിഭാ​ഗം നടന്മാർക്കും അസാമാന്യ കഴിവുണ്ടെന്നും അതുകൊണ്ട് തന്നെ മലയാള സിനിമയോട് അസൂയ തോന്നുന്നുണ്ടെന്നും നടി പറഞ്ഞു. തന്റെ പുതിയ ചിത്രമായ ശാകുന്തളത്തിന്റെ പ്രചരണത്തിന്റെ ഭാ​ഗമായി കൊച്ചിയിൽ സംസാരിക്കുകയായിരുന്നു താരം. മലയാളസിനിമയിലെ നടന്മാർക്കൊപ്പം പ്രവർത്തിച്ചപ്പോൾ മറ്റുഭാഷാ നടന്മാരിൽ നിന്ന് എന്ത് വ്യത്യാസമാണ് അനുഭവപ്പെട്ടതെന്ന ചോദ്യത്തിനായിരുന്നു സാമന്ത ഇത്തരത്തിൽ മറുപടി നൽകിയത്.

‘ഒരു മലയാളതാരത്തിനൊപ്പം അഭിനയിക്കുമ്പോൾ ആക്ടിങ് സ്കൂളിൽ പോകുന്നതുപോലെയാണ് തോന്നിയിട്ടുള്ളത്. അവർ നിങ്ങളെ അത്ഭുതപ്പെടുത്തും. ഫഹദ് ഫാസിലിനെ ഉദാഹരണമായെടുത്താൽ നിങ്ങൾ മനസിൽ കാണുന്ന കാര്യമായിരിക്കില്ല അദ്ദേഹം ചെയ്യുക. മലയാളത്തിലെ ഒരുവിധത്തിൽപ്പെട്ട നടന്മാർക്കെല്ലാം അങ്ങനെയൊരു കഴിവുണ്ട്. അത് വളരെ പ്രചോദനം നൽകുന്ന കാര്യമാണ്. നടിമാരുടെ കാര്യവും അങ്ങനെതന്നെ.’- സാമന്ത പറഞ്ഞു.

സാമന്തയ്‌ക്കൊപ്പം 2019-ൽ സൂപ്പർ ഡീലക്സ് എന്ന ചിത്രത്തിൽ ഫഹദ് ഫാസിലും കഴിഞ്ഞ വർഷം യശോദയിൽ ഉണ്ണി മുകുന്ദനും അഭിനയിച്ചിരുന്നു. ഇത്തവണ ശാകുന്തളത്തിൽ സൂഫിയും സുജാതയും’ എന്ന ചിത്രത്തിലൂടെ വെള്ളിത്തിരയിലെത്തിയ ദേവ് മോഹനാണ് അഭിനയിക്കുന്നത്. ശാകുന്തകളത്തിൽ ‘ദുഷ്യന്തനാ’യാണ് ദേവ് വേഷമിടുന്നത്.

മലയാളം, കന്നഡ, ഹിന്ദി, തമിഴ്, തെലുങ്ക് ഉൾപ്പടെ അഞ്ച് ഭാഷകളിൽ ഒരുങ്ങുന്ന ‘ശാകുന്തളം’ ത്രീഡിയിലാണ് റിലീസ് ചെയ്യുന്നത്. ​ഗുണശേഖറാണ് സംവിധാനം ചെയ്തിരിക്കുന്നത്. ഗുണ ടീം വർക്സിന്റെ ബാനറിൽ നീലിമ ഗുണ നിർമ്മിച്ചിരിക്കുന്ന ചിത്രം അവതരിപ്പിക്കുന്നത് ശ്രീ വെങ്കടേശ്വര ക്രിയേഷൻസിന്റെ ബാനറിൽ ദിൽ രാജുവാണ്. ഏപ്രില്‍ 14-ന് ചിത്രം റിലീസ് ചെയ്യുമെന്നാണ് അണിയറപ്രവർത്തകർ അറിയിച്ചിരിക്കുന്നത്.