കൊതുക് അത് എല്ലാ സമയത്തും ഒരു നാശം തന്നെയാണ്. എന്നാൽ പലപ്പോഴും പറയാറുള്ളത് എന്നെ മാത്രമാണ് കൊതുക് കടിക്കാറുള്ളതെന്നാണ്. ഇതിന് പിന്നിൽ എന്തെങ്കിലും വാസ്തവമുണ്ടോ? ഒരാളെ മാത്രം കൊതുക് കടിക്കുന്നതിന് പല കാരണങ്ങളുണ്ടെന്നാണ് പറയുന്നത്.
ഇരുണ്ട വസ്ത്രം ധരിക്കുകയാണെങ്കിൽ കൊതുകിനെ കൂടുതൽ ആകർഷിക്കുന്നതിന് കാരണമാകും. ചുവപ്പ്, കറുപ്പ്, നേവി ബ്ലൂ തുടങ്ങിയ നിറത്തിലുള്ള വസ്ത്രങ്ങളാണ് ധരിച്ചിരിക്കുന്നതെങ്കിൽ കൊതുക് നിങ്ങളിലേക്ക് ആകർഷിക്കപ്പെടും. കൊതുകിൽ നിന്ന് രക്ഷപ്പെടനായി ഫുൾസ്ലീവ് ആയിട്ടുള്ള വസ്ത്രം ധരിക്കന്നതിനൊപ്പം ഇളം നിറത്തിലുള്ള വസ്ത്രം ധരിച്ചാലും മതി. ഇറുകിയ വസ്ത്രവും ഒഴിവാക്കുക. അയഞ്ഞ വസ്ത്രങ്ങൾ ധരിച്ചാലും കൊതുകുകടി ഒഴിവാക്കാം.
അതുപോലെ തന്നെ കൊതുകുകളെ ആകർഷിക്കുന്ന ഒന്നാണ് ഗന്ധം. നിശ്വാസത്തിലൂടെ പുറത്തുവിടുന്ന കാർബൺ ഡൈഓക്സൈഡിന്റെ അളവും കൊതുകുകളെ ആശ്രയിക്കുന്നു. മലേറിയ അണുക്കളുടെ വാഹകരായ കൊതുകുകൾ ആർഷിക്കപ്പെടുന്നതിനുള്ള അപകടസാധ്യത ഗർഭിണികളായ സ്ത്രീകൾക്ക് അല്ലാത്ത സ്ത്രീകളെ അപേക്ഷിച്ച് ഇരട്ടിയായിരിക്കുമെന്ന് ഗവേഷണങ്ങൾ സൂചിപ്പിക്കുന്നു. ഗർഭാവസ്ഥയിൽ, മെറ്റാബോളിക് നിരക്ക് കൂടുന്നത് മൂലം സ്വതന്ത്രമാക്കപ്പെടുന്ന കാർബൺഡയോക്സൈഡിന്റെ അളവ് വർദ്ധിക്കുന്നതിനൊപ്പം ശരീരത്തിന്റെ ചൂട് അൽപം കൂടുകയും ചെയ്യുന്നത് കൊതുകുകളെ ആകർഷിക്കാൻ കാരണമാകുന്നു. ചർമ്മത്തിലെ ബാക്ടീരിയകൾ പുറപ്പെടുവിക്കുന്ന ഗന്ധം കൊതുകുകളെ ആകർഷിച്ചേക്കാമെന്ന് പഠനങ്ങൾ വ്യക്തമാക്കുന്നു.
രക്തഗ്രൂപ്പ് ‘ഒ’ ആണെങ്കിൽ കൊതുകുകൾ ആകർഷിക്കപ്പെടാനുള്ള സാധ്യത എ, ബി അല്ലെങ്കിൽ എബി ഗ്രൂപ്പിൽ ഉള്ളവരെക്കാൾ അധികമായിരിക്കും. രക്ത ഗ്രൂപ്പുമായി ബന്ധപ്പെട്ട് ഉത്പാദിപ്പിക്കപ്പെടുന്ന രാസ സ്രവമായിരിക്കാം ഇതിന് കാരണമാകുന്നതെന്ന് ജപ്പാനിൽ നിന്ന് പുറത്തുവന്ന പഠനത്തിൽ പറയുന്നുണ്ട്.
