ഒരുകാലത്ത് മലയാള സിനിമയെ അടക്കിഭരിച്ച താരങ്ങളാണ് ലേഡി സൂപ്പർസ്റ്റാർ മഞ്ജു വാര്യരും ആക്ഷൻ ഹീറോയിൻ എന്നറിയപ്പെട്ടിരുന്ന വാണി വിശ്വനാഥും. മഞ്ജു വാര്യർ ഇന്നും സിനിമയിൽ തിളങ്ങി നിൽക്കുക ആണെങ്കിൽ നടൻ ബാബുരാജിനെ വിവാഹം കഴിച്ചതിന് ശേഷം വാണി വിശ്വനാഥ് അഭിനയം നിർത്തിയിരുന്നു. നിലവിൽ വീട്ടമ്മയായി കഴിയുകയാണെങ്കിലും താരത്തിന്റെ വർക്കൗട്ട് ചിത്രങ്ങൾ ബാബുരാജ് സമൂഹമാദ്ധ്യമങ്ങളിൽ പങ്കുവെക്കാറുണ്ട്. അതേസമയം ഇപ്പോൾ സമൂഹമാദ്ധ്യമങ്ങളിൽ വെെറലാകുന്നത് മഞ്ജുവാര്യരുടെ ഒരു അഭിമുഖമാണ്. വാണി വിശ്വനാഥിന് തീരുമാനിച്ച ആ കിടിലൻ വേഷം അന്ന് മഞ്ജു വാര്യർ ചോദിച്ച് വാങ്ങിയ കഥയാണ് നടി പറയുന്നത്.
1996 ൽ പുറത്തിറങ്ങിയ സൂപ്പർഹിറ്റ് ചിത്രമാണ് സിബി മലയിൽ സംവിധാനം ചെയ്ത കളിവീട്. മഞ്ജു വാര്യർ ആദ്യമായി ഭാര്യ വേഷത്തിലെത്തിയ സിനിമയായിരുന്നു അത്. ചിത്രത്തിന്റെ രചന നിർവഹിച്ചത് ശശിധരൻ ആറാട്ടാണ്. മഞ്ജു വാര്യരും വാണി വിശ്വനാഥും ഈ സിനിമയിൽ അഭിനയിച്ചിരുന്നു. മലയാളത്തിന്റെ കുടുംബ നായകൻ ജയറാം പ്രധാന വേഷത്തിൽ എത്തിയ ചിത്രം ആ വർഷത്തെ ക്രിസ്മസ് റിലീസായാണ് തിയേറ്ററുകളിൽ എത്തിയത്.
മൃദുല എന്ന വീട്ടമ്മയുടെ റോളിൽ മഞ്ജു വാര്യർ നിറഞ്ഞു നിന്ന ചിത്രം. ആ അഭിനയ പ്രതിഭയുടെ ആക്ടിംഗ് സ്കിൽ പുറത്തു കൊണ്ട് വന്ന ചിത്രമാണെന്ന പ്രത്യേകതയുമുണ്ട് കളിവീടിന്. അതുവരെ കണ്ട മഞ്ജുവാര്യർ കഥാപാത്രങ്ങളിൽ നിന്ന് വിഭിന്നമായിരുന്നു കളിവീടിലെ മൃദുല. ഈ സിനിമയിൽ അഭിനയിക്കുമ്പോൾ പതിനെട്ട് വയസ്സ് മാത്രമായിരുന്നു മഞ്ജുവിന്റെ പ്രായം. എന്നാൽ സിനിമയിലെ നായിക വേഷം താൻ ചോദിച്ചു വാങ്ങിയതാണ് എന്നായിരുന്നു മഞ്ജുവാര്യർ പറയുന്നത്.
കളിവീടിൽ യാമിനി മേനോൻ എന്ന വാണി വിശ്വനാഥ് ചെയ്ത കഥാപാത്രമായിരുന്നു ആദ്യം മഞ്ജു ചെയ്യാനിരുന്നത്. എന്നാൽ മൃദുല എന്ന കഥാപാത്രത്തിന്റെ സ്വഭാവ രീതികൾ കേട്ട് ഇഷ്ടമായ മഞ്ജു വാര്യർ കളിവീടിലെ നായിക വേഷം സംവിധായകനോട് ചോദിച്ചു വാങ്ങുകയായിരുന്നു. സുനിത, ജഗദീഷ്, ഇന്നസെന്റ് കൽപ്പന, കൊച്ചിൻ ഹനീഫ തുടങ്ങിയവരായിരുന്നു ചിത്രത്തിലെ മറ്റു താരങ്ങൾ. ചിത്രം ബോക്സോഫീസിൽ വൻ വിജയം ആയിരുന്നു നേടിയെടുത്തത്.
