അപ്പമുണ്ടാക്കുമ്പോൾ മയമില്ലെന്നുള്ള പരാതി ഒട്ടുമിക്കവീടുകളിലും ഉയരാറുണ്ടാ. ചോറും തേങ്ങ ചിരകിയതും ഒക്കെ ചേർത്ത് അരച്ച് സോഡാപൊടി ഇട്ടാലും നല്ല ടേസ്റ്റും മയവും മിക്കപ്പോഴും വീട്ടിലുണ്ടാക്കുന്ന അപ്പത്തിന് കിട്ടാറില്ല. ഇതിന് നല്ലൊരു പൊടികൈയ്യുണ്ട്. മാത്രമല്ല മാവ് അരച്ച് പൊങ്ങിവരാൻ മണിക്കൂറുകൾ വയ്ക്കാതെ പഞ്ഞിപ്പോലെ മൃദുവായ അപ്പം ഉണ്ടാക്കാം.
ഇതിന് വേണ്ടി, ആദ്യം പച്ചരി നാലുമണിക്കൂർ കുതിരാൻ വയ്ക്കണം. അരി കുതിർന്ന് കഴിയുമ്പോൾ കഴുകിയെടുത്ത് ഇതിൽ ആവശ്യത്തിന് ചോറ്, തേങ്ങ ചിരണ്ടിയത്, ആവശ്യത്തിന് ഇളംചൂടുവെള്ളം, ഒരു സ്പൂൺ പഞ്ചസാര, ഒന്നര ടീസ്പൂൺ വെളിച്ചെണ്ണ, ഒന്നേമുക്കാൽ ടീസ്പൂൺ ഈസ്റ്റ് എന്നിവ ചേർത്ത് നന്നായി അരച്ചെടുക്കണം. ചോറ് ഫ്രിഡ്ജിൽ വച്ചതാണെങ്കിൽ അതേപ്പടി അരയ്ക്കാനായി എടുക്കരുത്. വെള്ളം കൂടുതലാവാകാതിരിക്കാനും ശ്രദ്ധിക്കണം.
ഇളം ചൂടുവെള്ളം ചേർത്ത് അരയ്ക്കുമ്പോൾ മാവ് എഴുപ്പത്തിൽ പുളിച്ച് കിട്ടും. അരച്ച മാവ് പത്തുമിനിട്ട് നേരം വയ്ക്കണം. തണുപ്പുള്ള സ്ഥലമാണെങ്കിൽ അര മണിക്കൂർ വയ്ക്കണം. അപ്പത്തിനുള്ള മാവ് റെഡിയായിക്കഴിഞ്ഞു. ഇനി ഇത് അപ്പച്ചട്ടിയിൽ ഒഴിച്ച് ചുട്ടെടുക്കാം. പാനിൽ ഒഴിച്ച് കുമിളകൾ വന്നതിനുശേഷം അടച്ചുവയ്ക്കണം. ശേഷം നല്ല പൂപോലെ മൃദുലമായ അപ്പം തയ്യാറാക്കാം.
