ചെന്നൈ: കരസേനാ മേധാവി ജനറൽ മനോജ് പാണ്ഡെ ചെന്നൈ സൈനിക കേന്ദ്രം സന്ദർശിച്ചു. പ്രതിരോധ രംഗത്ത് കാലാനുസൃതമായി മാറ്റങ്ങൾ കൊണ്ടുവരേണ്ടതിന്റെ ആവശ്യകതയെ കുറിച്ച് ഉദ്യോഗസ്ഥരെ അഭിസംബോധന ചെയ്യവെ അദ്ദേഹം പരാമർശിച്ചു. യുദ്ധരംഗത്തെ കാലാനുസൃതമായ മാറ്റങ്ങൾ, പ്രതിരോധ ഉപകരണങ്ങളുടെ ആഭ്യന്തര ഉത്പാദന ശേഷി വർദ്ധിപ്പിക്കുന്നതിന്റെ പ്രാധാന്യം എന്നിവയെക്കുറിച്ചും അദ്ദേഹം സംസാരിച്ചു.
അർപ്പണ മനോഭാവമുള്ള യുവ സൈനികരെ കണ്ടെത്താനുള്ള അഗ്നിപഥ് പദ്ധതിയുടെ പ്രാധാന്യത്തെക്കുറിച്ചും അദ്ദേഹം എടുത്തുപറഞ്ഞു. ചെന്നൈ സൈനിക കേന്ദ്രം നടത്തുന്ന സൈനിക, ദുരന്ത നിവാരണ പ്രവർത്തനങ്ങളെ കുറിച്ച് ലഫ്നന്റ് ജനറൽ എ അരുൺ സൈനിക മേധാവിയോട് വിവരിച്ചു.
ചെന്നൈ മിലിട്ടറി സ്റ്റേഷനിലെ എല്ലാ സേനാംഗങ്ങളെയും കരസേനാ മേധാവി അഭിനന്ദിച്ചു. രാജ്യത്തെ സേവിക്കുന്നതിൽ സൈനികർ പുലർത്തുന്ന അർപണമനോഭാവം, സന്നദ്ധത, ആത്മസമർപ്പണം എന്നിവ എടുത്തുപറയേണ്ടതാണെന്ന് ജനറൽ മനോജ് പാണ്ഡെ വ്യക്തമാക്കി.
Comments