പ്രഖ്യാപനം മുതൽ ആരാധകരെ ആവേശത്തിൽ ആഴ്‌ത്തിയ ചിത്രമാണ് ഏജന്റ്. ചിത്രത്തിൽ ഏറെ നാളുകൾക്ക് ശേഷം മമ്മൂട്ടി ഒരു തെലുങ്ക് ചിത്രത്തിൽ അഭിനയിക്കുന്നു എന്ന പ്രത്യേകതയും ചിത്രത്തിനുണ്ടായിരുന്നു. അഖിൽ അക്കിനേനി നായകനായി എത്തിയ ചിത്രത്തിൽ ഒരു നെഗറ്റീവ് ഷേഡുള്ള വേഷമാണ് മമ്മൂട്ടി അവതരിപ്പിക്കുന്നത് എന്ന റിപ്പോർട്ടും പുറത്ത് വന്നിരുന്നു. തെലുങ്കിനെ കൂടാതെ മലയാളം, തമിഴ്, കന്നഡ ഭാഷകളിലാണ് ചിത്രം തിയറ്ററുകളിൽ എത്തിയത്.
ഏറെ കാത്തിരിപ്പിനൊടുവിൽ ഇന്ന് തിയറ്ററുകളിൽ എത്തിയ ചിത്രം ഒരു സ്‌പൈ ആക്ഷൻ ത്രില്ലർ ഗണത്തിൽപെട്ട ചിത്രമാണ്. ആദ്യ ഷോ കഴിയുമ്പോൾ ചിത്രത്തിന് സമ്മിശ്ര പ്രതികരണമാണ് ലഭിക്കുന്നത്. അഖിലിന്റേയും മമ്മൂട്ടിയുടേയും പ്രകടനത്തെ പ്രശംസിക്കുന്നതിനോടൊപ്പം തന്നെ വിമർശനവും ഉയരുന്നുണ്ട്.
കേണൽ മഹദേവായാണ് മമ്മൂട്ടി ചിത്രത്തിൽ എത്തിയത്. സ്‌പൈ ഏജന്റായ റിക്കി എന്ന കഥാപാത്രത്തെയാണ് അഖിൽ ചിത്രത്തിൽ അവതരിപ്പിച്ചിരിക്കുന്നത്. എന്നാൽ പ്രതീക്ഷക്കൊത്ത് എത്തിയില്ലെന്നാണ് ആരാധകർ പറയുന്നത്. ചിത്രത്തിന്റെ തിരക്കഥ പരാജയ മായിരുന്നെങ്കിലും ആക്ഷൻ രംഗങ്ങൾ ചിത്രത്തിനോട് നീതി പുലർത്തിയെന്നും ആരാധകർ ട്വിറ്റ് ചെയ്തു. ഒരു തവണ മാത്രം കാണാൻ പറ്റുന്ന ചിത്രമാണെന്നാണ് ആരാധകരുടെ അഭിപ്രായം. ചിത്രത്തിലെ അഖിലിന്റെ ബോഡി ട്രാൻസ്ഫോർമേഷൻ പ്രേക്ഷരുടെ ഇടയിൽ ചർച്ചയായിട്ടുണ്ട്. അഖിലിന്റെ വൺ മാൻ ഷോയാണ് ചിത്രമെന്നും മമ്മൂട്ടി കുഴപ്പമില്ലെന്നും ചിലർ അഭിപ്രായപ്പെടുന്നുണ്ട്.
