തിരുവണ്ണാമലയിൽ നാല് എടിഎമ്മുകളിൽ ഒരേ സമയം കവർച്ച നടത്തിയ സംഭവം; മുഖ്യപ്രതി പിടിയിൽ

ചെന്നൈ: തമിഴ്‌നാട് തിരുവണ്ണാമലയിൽ നാല് എടിഎമ്മുകളിൽ നിന്നായി 73 ലക്ഷത്തോളം രൂപ മോഷ്ടിച്ച കേസിലെ മുഖ്യപ്രതി അറസ്റ്റിൽ. ഹരിയാന സ്വദേശി ആസിഫ് ജാവേദാണ് പിടിയിലായത്. ഒളിവിൽ കഴിഞ്ഞിരുന്ന ഇയാളെ പ്രത്യേക അന്വേഷണ സംഘമാണ് പിടികൂടിയത്. കേസിൽ ഇതുവരെ ഒൻപത് പേർ അറസ്റ്റിലായി.

ഫെബ്രുവരി 12-നാണ് തിരുവണ്ണാമല നഗരത്തിലെ നാല് എടിഎമ്മുകളിൽ ഒരേ സമയം കവർച്ച നടന്നത്. സംഭവത്തിൽ 72,79,000 രൂപയാണ് നഷ്ടപ്പെട്ടത്. കേസിൽ അന്വേഷണം ആരംഭിച്ച പൊലീസ് ഒൻപത് സംഘങ്ങളായി അന്വേഷണ സംഘത്തെ രൂപീകരിച്ചു. ബെംഗളൂരുവിൽ നിന്നും ആന്ധ്രാപ്രദേശിൽ നിന്നുമായി എട്ടുപേരെ ഇതുവരെ അറസ്റ്റു ചെയ്തു. മുഖ്യപ്രതി ആസിഫ് ജാവേദിനായുള്ള അന്വേഷണം പുരോഗമിക്കവേ പോലീസ് ഇയാൾ ഹരിയാനയിലെ ആരവല്ലി മലനിരകളിൽ ഒളിവിൽ കഴിയുന്നതായി കണ്ടെത്തുകയായിരുന്നു.

തിരുവണ്ണാമല പൊലിസിന്റെ സ്‌പെഷ്യൽ ടാസ്‌ക് ഫോഴ്‌സ്, ഒരാഴ്ചയായി സ്ഥലത്ത് ക്യാംപ് ചെയ്ത ശേഷമാണ് പ്രതിയെ പിടികൂടിയത്. വീട്ടിൽ നിന്നും പുറത്തുവരാൻ തയ്യാറാകാതിരുന്ന ആസിഫിനെ തോക്കുചൂണ്ടി ഭീഷണിപ്പെടുത്തിയാണ് പോലീസ് കീഴ്‌പ്പെടുത്തിയത്. വീടിന്റെ വാതിൽ തകർത്തായിരുന്നു അന്വേഷണ സംഘം ഇയാളെ അറസ്റ്റു ചെയ്തത്. ഇയാളിൽ നിന്നും രണ്ട് കാറുകളും 15 ലക്ഷം രൂപയും കണ്ടെത്തി. കേസിൽ നേരത്തെ പിടിയിലായ എട്ടുപേരിൽ നിന്നും അഞ്ച് ലക്ഷം രൂപയും ഒരു കാറും കണ്ടെയ്‌നർ ലോറിയും പോലീസ് പിടിച്ചെടുത്തിരുന്നു.