മുംബൈ: കർണാടകയിലെ ജനങ്ങൾ ഇരട്ട എഞ്ചിൻ സർക്കാരിനെ തിരഞ്ഞെടുക്കുമെന്ന് മഹാരാഷ്ട്ര മുഖ്യമന്ത്രി ഏകനാഥ് ഷിൻഡെ. കേന്ദ്ര സർക്കാരിന്റെ പൂർണ്ണ സഹകരണത്തോടെയാണ് മഹാരാഷ്ട്ര ഇപ്പോൾ വികസന പദ്ധതികൾ നടപ്പിലാക്കുന്നതെന്നും ഷിൻഡെ പറഞ്ഞു. കർണാടകയിലെ അവസാനഘട്ട പ്രചാരണത്തിന്റെ ഭാഗമായി മാദ്ധ്യമങ്ങളോട് സംസാരിക്കുകയായിരുന്നു അദ്ദേഹം.
‘കഴിഞ്ഞ നാല് വർഷമായി സംസ്ഥാനത്തിന്റെ വികസന പദ്ധതികൾക്കായി കേന്ദ്ര സർക്കാർ കോടികളാണ് ചിലവഴിച്ചത്. അതിനാൽ ഇരട്ട എഞ്ചിൻ സർക്കാരിനെ കർണാടകയിലെ ജനങ്ങൾ തിരഞ്ഞെടുക്കും എന്നതിൽ സംശയമില്ല. കേന്ദ്രത്തിലും സംസ്ഥാനത്തിലും പരസ്പരം എതിർക്കുന്ന രണ്ട് പാർട്ടികളാണ് അധികാരത്തിലിരിക്കുന്നതെങ്കിൽ അവിടെ വികസനം തടസ്സപ്പെടും. ബെംഗളൂരുവിലും മംഗളൂരുവിലും നിരവധി വിഭാഗങ്ങളിലെ ആളുകളുമായി സംസാരിച്ചിട്ടുണ്ട്. ജനങ്ങൾ വൻ ഭൂരിപക്ഷത്തോടെ ബിജെപി സർക്കാരിനെ തിരഞ്ഞെടുക്കുമെന്ന് ഉറപ്പാണ്’മുഖ്യമന്ത്രി പറഞ്ഞു.
ബജ്റംഗ്ദളിനെ നിരോധിക്കുമെന്ന് കോൺഗ്രസിന്റെ പ്രകടന പത്രികയിൽ ഉണ്ടായിരുന്നു. എന്നാൽ ബജ്റംഗ്ദളും ആർഎസ്എസുമൊക്കെ ദേശസ്നേഹമുള്ള സംഘടനകളാണെന്നും അദ്ദേഹം കൂട്ടിച്ചേർത്തു.
