സ്റ്റോക്ക്ഹോം: ബെൽജിയം പ്രധാനമന്ത്രി അലക്സാണ്ടർ ഡി ക്രൂ ചൊവ്വാഴ്ച കേന്ദ്ര മന്ത്രിമാരുമായി കൂടിക്കാഴ്ച നടത്തി. വിദേശകാര്യ മന്ത്രി എസ് ജയശങ്കർ, വാണിജ്യ വ്യവസായ മന്ത്രി പിയൂഷ് ഗോയൽ, കേന്ദ്ര സംരംഭകത്വ വികസന സഹമന്ത്രി രാജീവ് ചന്ദ്രശേഖർ എന്നിവരുമായാണ് ബെൽജിയം പ്രധാനമന്ത്രി കൂടിക്കാഴ്ച നടത്തിയത്. പുനരുപയോഗ ഊർജ്ജം, സാങ്കേതികവിദ്യ എന്നീ വിഷയങ്ങൾ ചർച്ചവിഷയമായിരുന്നു.
‘ഇന്ത്യയുമായുള്ള ബെൽജിയം, യൂറോപ്യൻ യൂണിയൻ പങ്കാളിത്തം മെച്ചപ്പെടുത്തുന്നതിനായി ഡോ.എസ്.ജയശങ്കർ, പിയൂഷ് ഗോയൽ, രാജീവ് ചന്ദ്രശേഖർ എന്നിവരുമായി കൂടിക്കാഴ്ച നടത്തി. പുനരുപയോഗ ഊർജം, സാങ്കേതിക വിദ്യ എന്നിങ്ങനെ പ്രധാന മേഖലകളിലെ ബന്ധം കൂടുതൽ ദൃഢമാക്കാൻ ശ്രദ്ധ കേന്ദ്രീകരിച്ചു.’ ബെൽജിയം പ്രധാനമന്ത്രി ട്വീറ്റ് ചെയ്തു.
സ്വീഡനിലെ സ്റ്റോക്ക്ഹോമിൽ നടന്ന ഇന്തോ- പസഫിക് മിനിസ്ട്രിയൽ ഫോറം ഉച്ചകോടിയിൽ പങ്കെടുക്കാൻ എത്തിയപ്പോഴായിരുന്നു കൂടിക്കാഴ്ച. ആസ്ട്രിയ, ഫ്രാൻസ്, ലിത്വാനിയ, ബെൽജിയം, സൈപ്രസ്, റൊമേനിയ, ബൾഗേറിയ എന്നീ രാജ്യങ്ങളിലെ വിദേശകാര്യമന്ത്രിമാരുമായും ഇന്ത്യൻ വിദേശകാര്യമന്ത്രി എസ്. ജയശങ്കർ കൂടിക്കാഴ്ച നടത്തി.
