ശരീരവണ്ണം കുറയ്ക്കാൻ പാടുപെടുന്നവരാണ് ഭൂരിഭാഗമാളുകളും. അത്തരക്കാരുടെ പ്രധാന ശത്രുക്കളിലൊന്നാണ് പഞ്ചസാര. മധുരം കഴിക്കാൻ താൽപര്യമുള്ളവർക്ക് വണ്ണം കുറയ്‌ക്കേണ്ടി വരുമ്പോൾ പഞ്ചസാര ഉപേക്ഷിക്കാൻ വളരെ പ്രയാസം അനുഭവപ്പെടാറുണ്ട്. അതുകൊണ്ട് ചിലർ പഞ്ചസാര ഒഴിവാക്കുന്നതിന് പകരം മറ്റ് മാർഗങ്ങൾ തിരഞ്ഞെടുക്കുന്നു. പഞ്ചസാരയ്‌ക്ക് പകരമായി മധുരം കിട്ടുന്ന മറ്റ് വസ്തുക്കൾ ഉപയോഗിക്കുന്നതാണ് ചിലരുടെ രീതി. എന്നാൽ ഇതിൽ ജാഗ്രത പാലിക്കണമെന്ന മുന്നറിയിപ്പ് നൽകുകയാണ് ലോകാരോഗ്യ സംഘടന.
പഞ്ചസാരയ്‌ക്ക് പകരം മറ്റ് മധുരം ഉൾപ്പെടുത്തുന്നത് ടൈപ്പ് 2 പ്രമേഹം, ഹൃദ്രോഗം, സാംക്രമികരോഗങ്ങൾ എന്നിവയ്‌ക്ക് കാരണമാവുമെന്നാണ് ലോകാരോഗ്യ സംഘടന വ്യക്തമാക്കുന്നത്. പ്രധാന നോൺ ഷുഗർ സ്വീറ്റ്നേഴ്സ് ആയി കണക്കാക്കുന്ന എയ്സൾഫെയിം കെ, അസ്പാർടെയിം, സൈക്ലാമേറ്റ്സ്, അഡ്വാൻടെയിം, നിയോടെയിം, സാകറിൻ, സൂക്രലോസ്, സ്റ്റെവിയ തുടങ്ങിയ വസ്തുക്കൾ പഞ്ചസാരയ്‌ക്ക് പകരമായി ഉപയോഗിക്കുന്ന ശീലം ഒഴിവാക്കണമെന്ന് ലോകാരോഗ്യ സംഘടന നിർദേശിക്കുന്നു. ഇത്തരം വസ്തുക്കളിൽ കലോറി കുറവായിരിക്കും. അതുമല്ലെങ്കിൽ പൂർണമായും കലോറി ഇല്ലാത്തതായിരിക്കും. അതിനാൽ വണ്ണം കുറയ്ക്കാൻ തീരുമാനിച്ചവർക്ക് ഇത് വളരെ അനുയോജ്യമാണെന്നാണ് പലരും കരുതുന്നത്. എന്നാൽ ഇവ വണ്ണം കുറയുന്നതിന് ഒരു തരത്തിലും സഹായിക്കില്ലെന്നും പല രോഗങ്ങളും പിടിപ്പെടാൻ കാരണമാകുമെന്നും ലോകാരോഗ്യ സംഘടന മുന്നറിയിപ്പ് നൽകുന്നു.
നോൺ ഷുഗർ സ്വീറ്റ്നേഴ്സിന്റെ അമിത ഉപയോഗം രോഗങ്ങളെ ക്ഷണിച്ചു വരുത്തും. ഇവയിൽ അടങ്ങിയിട്ടുള്ള കെമിക്കലുകളാണ് ദോഷം ചെയ്യുന്നത്. ഷുഗർ സബ്സ്റ്റിറ്റിയൂട്ടുകൾക്ക് പോഷകമൂല്യമില്ല. ഒരു വ്യക്തി തന്റെ കുട്ടിക്കാലം മുതൽ തന്നെ മധുരത്തിന്റെ ഉപയോഗം നിയന്ത്രിക്കുന്നതാണ് അനുയോജ്യമെന്ന് ലോകാരോഗ്യ സംഘടന നിർദ്ദേശിക്കുന്നു.
Comments