ഡെറാഡൂൺ: രാജ്യത്ത് എകീകൃത സിവിൽ കോഡ് അനിവാര്യമാണെന്ന് ഉത്തരാഖണ്ഡ് മുഖ്യമന്ത്രി പുഷ്കർ സിംഗ് ധാമി. വ്യക്തി നിയമങ്ങൾക്കപ്പുറം എല്ലാവർക്കും തുല്യത നൽകുന്ന നിയമം ജനങ്ങൾ പ്രതീക്ഷിക്കുന്നുണ്ടെന്നും സംസ്ഥാനത്ത് ഏകീകൃത സിവിൽകോഡ് നടപ്പിലാക്കുമെന്നും അദ്ദേഹം പറഞ്ഞു. മാദ്ധ്യമങ്ങളോട് സംസാരിക്കവെയാണ് മുഖ്യമന്ത്രി ഇക്കാര്യം വ്യക്തമാക്കിയത്.
‘എല്ലാ പൗരന്മാർക്കും തുല്യ നിയമം ഉറപ്പാക്കുന്ന ഏകീകൃത സിവിൽ കോഡ് ജനങ്ങൾ പ്രതീക്ഷിക്കുന്ന ഒന്നാണ.് 2022-ലെ നിയമസഭാ തിരഞ്ഞെടുപ്പിൽ സർക്കാർ സംസ്ഥാനത്തെ ജനങ്ങൾക്ക് നൽകിയ വാഗ്ദാനമാണ് ഏകീകൃത സിവിൽകോഡ്. നിയമം നടപ്പിലാക്കുന്നതിന്റെ സാധ്യത പരിശോധിക്കുന്നതിനായി ഇതിനോടകം കമ്മിറ്റി രൂപീകരിച്ചിട്ടുണ്ട്. ഉത്തരാഖണ്ഡിന് പുറമേ ഗുജറാത്തും നിയമം നടപ്പിലാക്കുന്നതിനുള്ള പ്രാഥമിക നടപടികൾ ആരംഭിച്ചിട്ടുണ്ട്. രാജ്യത്തിന് ഏകീകൃത സിവിൽ കോഡ് അനിവാര്യമാണെന്നും’മുഖ്യമന്ത്രി പറഞ്ഞു.
‘കേന്ദ്ര സർക്കാരിന്റെ മികച്ച ഭരണം നൽകാനുള്ള വെല്ലുവിളികൾ നമുക്ക് മുന്നിലുണ്ട്. ഈ വെല്ലുവിളികളെ തരണം ചെയ്താണ് മുന്നോട്ട് പോകേണ്ടത്. ഉത്തരാഖണ്ഡിലെ ഗതാഗതക്കുരുക്ക് പരിഹരിക്കാൻ ഡൽഹി-ഡെറാഡൂൺ എലിവേറ്റഡ് റോഡ് ഉടൻ നിർമ്മിക്കും. ഇതിനായി സംസ്ഥാനത്തെ പലയിടത്തും റോഡ് നിർമ്മാണം പുരോഗമിക്കുകയാണെന്ന് മുഖ്യമന്ത്രി വ്യക്തമാക്കി.
