75 വയസിന് മുകളിൽ പ്രായമായ മരങ്ങൾ തൊടിയിലുണ്ടോ? സംരക്ഷിച്ചാൽ പെൻഷനായി ലഭിക്കുക 2,500 രൂപ

ചണ്ഡീഗഡ്: പരിസ്ഥിതി മൂല്യങ്ങൾക്ക് വില നൽകി 75 വയസിന് മേൽ പ്രായമുള്ള മരങ്ങൾ സംരക്ഷിക്കാനൊരുങ്ങി ഹരിയാന സർക്കാർ. ഹരിയാന വനംവകുപ്പ്-പരിസ്ഥിതി മന്ത്രി കാൻവർ പാലാണ് ഇക്കാര്യം ഔദ്യോഗികമായി അറിയിച്ചത്. പ്രായമുള്ള മരങ്ങളുടെ സംരക്ഷണത്തിന് അഞ്ച് വർഷക്കാലയളവിലേക്ക് ‘ഹരിയാന വായു ദേവ്താ പെൻഷൻ സ്‌കീം’ എന്ന പദ്ധതിയ്‌ക്കും സർക്കാർ രൂപം നൽകിയതായി അറിയിച്ചു.

പദ്ധതിയനുസരിച്ച് മരങ്ങളുടെ ഉടമസ്ഥന് 2,500 രൂപ പ്രതിവർഷ പെൻഷൻ തുക ലഭിക്കും. ബാങ്ക് അക്കൗണ്ടിലേയ്‌ക്ക് നേരിട്ടായിരിക്കും പെൻഷൻ തുക നിക്ഷേപിക്കുന്നത്. എല്ലാ വർഷവും പെൻഷൻ തുകയിൽ വർദ്ധനവും ഉണ്ടായിരിക്കും. 75 വർഷത്തിലധികം പ്രായമുള്ള മരങ്ങൾക്കാണ് പെൻഷൻ ലഭിക്കുക. ഏതെങ്കിലും രോഗം ബാധിച്ചതോ പൊള്ളയായതോ ആയ മരങ്ങൾക്ക് പെൻഷൻ ലഭിക്കില്ല.

കൂടാതെ വനമേഖലയിലുള്ള മരങ്ങളും പദ്ധതിയിൽ ഉൾപ്പെടുത്തിയിട്ടില്ല. അഞ്ച് വർഷത്തിന് ശേഷം അവലോകന യോഗം നടത്തുന്നത് വരെ 4,000 മരങ്ങൾ മാത്രമാകും പദ്ധതിയുടെ കീഴിൽ ഉൾപ്പെടുത്തുക. ഇതിന് ശേഷം നടക്കുന്ന റിവ്യൂ മിറ്റിംഗുകൾക്ക് അനുസൃതമായി ആയിരിക്കും ബാക്കിയുള്ള നടപടിക്രമങ്ങൾ പൂർത്തിയാക്കുക. രാജ്യം മുഴുവൻ ഇത്തരത്തിൽ സംരക്ഷണ പ്രവർത്തനങ്ങളും മരം നട്ടുവളർത്തലും കാര്യമായി പുരോഗമിച്ചുകൊണ്ടിരിക്കുകയാണ്.