ആദ്യം മുതൽ അവസാനം വരെ സസ്‌പെൻസ്; ‘കേരള ക്രൈം ഫയൽസ്’ സ്ട്രീമിങ് തുടങ്ങി

മലയാളം വെബ് സീരിസ് ‘കേരള ക്രൈം ഫയൽസ്’ സ്ട്രീമിങ് ആരംഭിച്ചു. തികച്ചുമൊരു ക്രൈം ത്രില്ലർ സീരിസാണ് ‘കേരള ക്രൈം ഫയൽസ് ഷിജു പാറയിൽ വീട് നീണ്ടകര’. ആദ്യം മുതൽ അവസാനം വരെ േ്രപക്ഷകരെ പിടിച്ചിരുത്തുന്ന അതി മനോഹര സസ്‌പെൻസ് വെബ്‌സീരിസ്. ആദ്യ എപ്പിസോഡിൽ തന്നെ പ്രേക്ഷകരെ ചിന്തിപ്പിക്കാനും ഓരോ സീൻ കാണുമ്പോഴും ആകാംഷയുടെ മുൾമുനയിൽ നിർത്താനും സീരിസിന് സാധിച്ചു.

ലാലും അജു വർഗീസും ഒന്നിച്ചിട്ടുള്ള മാസ്മരിക പ്രകടനമാണ് ക്രൈം സിനിമയെ അതിന്റെ ഉയർന്ന തലങ്ങളിലേക്ക് കൊണ്ടു പോകുന്നത്. ‘ജൂൺ’, ‘മധുരം’ എന്നീ സിനിമകളിലൂടെ ശ്രദ്ധേയനായ അഹമ്മദ് കബീറിന്റെ സംവിധാനത്തിലൊരുങ്ങുന്ന സീരിസ് ഇതിനോടകം ആരാധകരെ കൈയ്യിലെടുത്ത് കഴിഞ്ഞു. സീരിസിൽ ലാലും അജു വർഗീസും പോലീസ് വേഷത്തിലാണെത്തുന്നത്. കൊച്ചിയിലെ ഒരു പഴയ ലോഡ്ജിൽ നടക്കുന്ന സെക്സ് വർക്കറുടെ കൊലപാതകവും തുടർന്ന് നടക്കുന്ന പോലീസ് അന്വേഷണവുമാണ് സീരിസിന്റെ ഇതിവൃത്തം. അന്വേഷണത്തിനിടെ നേരിടുന്ന നൂലാമാലകളാണ് സീരിസിന്റെ സസ്‌പെൻസ് രംഗങ്ങൾ പിടിച്ചടക്കുന്നത്. ഇന്ന് സ്ട്രീമിങ് ആരംഭിച്ച ക്രൈം സീരീസിന് ഇതിനോടകം മികച്ച സ്വീകരണമാണ് പ്രേക്ഷകരുടെ ഭാഗത്ത് നിന്നുണ്ടാകുന്നത്.

അജു വർഗീസിന്റെ തകർപ്പൻ പ്രകടനമാണ് സീരിസിലുടനീളം ഉള്ളതെന്നാണ് പ്രേക്ഷകരുടെ അഭിപ്രായം. മലയാളത്തിന് പുറമേ തമിഴ്, തെലുങ്ക്, ഹിന്ദി, കന്നഡ, ബംഗാളി, മറാത്തി തുടങ്ങിയ ഭാഷകളിലും സീരീസ് ലഭ്യമാകും. ഡിസ്നി + ഹോട്ട്സ്റ്റാറിലാണ് മലയാളത്തിലെ ആദ്യത്തെ ഒറിജിനൽ വെബ് സീരീസ് പുറത്തിറങ്ങുന്നത്. സീരിസിന്റെ ട്രെയിലർ തന്നെ അക്ഷരാർത്ഥത്തിൽ പ്രേക്ഷകരെ പിടിച്ചിരുത്തുന്നുണ്ട്. കൊലപാതക സീനിൽ നിന്ന് ആരംഭിക്കുന്ന ആദ്യ എപ്പിസോഡ് മുതൽ കുറ്റവാളിയെ കണ്ടെത്തുന്ന അവസാന എപ്പിസോഡ് വരെ സസ്‌പെൻസ് നിറഞ്ഞ കഥയാണ് സീരിസിലുള്ളത്. ഇന്ത്യയിലെ മറ്റ് വെബ്‌സീരിസുകളുടെ നിലവാരത്തിലാണ് ‘കേരള ക്രൈം ഫയൽസ്’ചിത്രീകരിച്ചിരിക്കുന്നത്. ജിതിൻ സ്റ്റാനിസ്ലോസാണ് ഛായാഗ്രാഹണം നിർവഹിച്ചിരിക്കുന്നത്.