വാഷിംഗ്ടൺ: തട്ടികൊണ്ടുപോകുകയാണെന്ന് തെറ്റിദ്ധരിച്ച് ടാക്‌സി ഡ്രൈവറുടെ തലയിൽ വെടിവച്ച് യുവതി. ഊബർ ഡ്രൈവറെയാണ് യുവതി വെടിവെച്ച് വീഴ്‌ത്തിയത്. യുഎസിലെ ടെക്‌സസിലാണ് സംഭവം. മെക്‌സിക്കോയിലേക്ക് തട്ടിക്കൊണ്ട് പോകുകയാണെന്ന് തെറ്റിദ്ധരിച്ചാണ് യുവതി ഊബർ ഡ്രൈവർ ഡാനിയേൽ പിയാഡ്ര ഗാർഷ്യയ്‌ക്കു നേരെ വെടിയുതിർത്തത്.
സംഭവത്തെ തുടർന്ന് പോലീസ് യുവതിയ്‌ക്കെതിരെ വധശ്രമത്തിന് കേസെടുത്തിട്ടുണ്ട്. കെന്റക്കി സ്വദേശിയായ യുവതി തന്റെ സുഹൃത്തിനെ കാണുന്നതിനായാണ് ടെക്‌സസിൽ എത്തിയത്. മെക്‌സിക്കോയിലേക്കുള്ള ട്രാഫിക് ചിഹ്നം കണ്ടപ്പോൾ യുവതി ആശങ്കയിലായി. തട്ടിക്കൊണ്ടുപോകുകയാണെന്ന് കരുതി യുവതി ഡ്രൈവറുടെ തലയ്‌ക്ക് പിറകിലേക്ക് വെടിയുതിർക്കുകയായിരുന്നു.
ഊബർ ആപ്പിൽ കാണിച്ച വഴിയിലൂടെയാണ് ഡാനിയേൽ പോയതെന്ന് അദ്ദേഹത്തിന്റെ ഭാര്യ പറഞ്ഞു. ഊബർ ഡ്രൈവറുടെ കുടുംബത്തിന് 1.5 മില്യൺ ഡോളർ നഷ്ടപരിഹാരം നൽകണമെന്നും പോലീസ് അറിയിച്ചു. യുവതിയെ തട്ടിക്കൊണ്ടുപോകാൻ ശ്രമം നടന്നിട്ടില്ലെന്നാണ് പോലീസ് അന്വേഷണത്തിൽ വ്യക്തമാകുന്നത്. അതിക്രമങ്ങൾ അനുവദിക്കില്ലെന്നും അക്രമികളായ യാത്രക്കാർക്ക് വിലക്കേർപ്പെടുത്തുമെന്നും കമ്പനി വ്യക്തമാക്കി.
Comments