സൂറിച്ച്: ഫിഫ റാങ്കിംഗിൽ മികച്ച പ്രകടനങ്ങളുടെ അടിസ്ഥാനത്തിൽ നിലമെച്ചപ്പെടുത്തി ഇന്ത്യ. ഒരിടവേളയ്ക്ക് ശേഷമാണ് ഇന്ത്യ ആദ്യ നൂറിൽ തിരിച്ചെത്തിയത്. 2018 മാർച്ചിൽ 99ാം സ്ഥാനത്തെത്തിയ ശേഷം ഇന്ത്യയുടെ ഏറ്റവും മികച്ച റാങ്കിംഗാണ് ഇത്തവണത്തേത്. നൂറാമതാണ് ഇന്ത്യയുടെ സ്ഥാനം. ഇന്റർകോണ്ടിനന്റൽ കപ്പിൽ കിരീട നേട്ടവും സാഫ് കപ്പിൽ തുടരുന്ന മികച്ച പ്രകടനവും റാങ്കിംഗിന് ഗുണം ചെയ്തെന്നാണ് വിലയിരുത്തൽ.
അതേസമയം ഫിഫ റാങ്കിംഗിൽ ലോക ചാമ്പ്യൻമാരായ അർജന്റീന ഒന്നാം സ്ഥാനം നിലനിർത്തിയപ്പോൾ ലോകകപ്പ് റണ്ണറപ്പുകളായ ഫ്രാൻസ് രണ്ടാം സ്ഥാനത്തുണ്ട്. ബ്രസീൽ മൂന്നാം സ്ഥാനത്തേക്ക് വീണു. ഏറെക്കാലത്തിന് ശേഷമാണ് കാനറികൾ മൂന്നാം സ്ഥാനത്തേക്ക് വീഴുന്നത്. ഫിഫ ലോകകപ്പിലെ പ്രകടനത്തിന് പിന്നാലെ ടീമിന്റെ ഒന്നാം സ്ഥാനം നഷ്ടമായിരുന്നു.
കഴിഞ്ഞ വർഷം സെപ്റ്റംബറിൽ ത്രിരാഷ്ട്ര ടൂർണമെൻറിൽ വിയറ്റ്നാമിനോട് എതിരില്ലാത്ത മൂന്ന് ഗോളിന് തോറ്റശേഷം പിന്നീട് കളിച്ച 9 മത്സരങ്ങളിൽ ഏഴ് ജയവും രണ്ട് സമനിലയുമായി അപരാജിത കുതിപ്പാണ് ഇന്ത്യ നടത്തിയത്. ഇന്ത്യയിൽ കഴിഞ്ഞ നാലു വർഷമായി പരാജയമറിഞ്ഞിട്ടില്ലെന്ന റെക്കോർഡ് നിലനിർത്താൻ സുനിൽ ഛേത്രിക്കും സംഘത്തിനുമായി. ലോകകപ്പ് യോഗ്യതാ പോരാട്ടത്തിൽ നാലു വർഷം മുമ്പ് ഒമാനോടാണ് ഇന്ത്യ നാട്ടിൽ അവസാനമായി പരാജയമറിഞ്ഞത്(2-1).
2018 ഓഗസ്റ്റിൽ 96ാം സ്ഥാനത്ത് എത്തിയതാണ് കഴിഞ്ഞ അഞ്ച് വർഷത്തിനിടെ ഇന്ത്യയുടെ ഏറ്റവും മികച്ച റാങ്കിംഗ്.ഇംഗ്ലണ്ട് നാലാം സ്ഥാനത്തും ബെൽജിയം അഞ്ചാം സ്ഥാനത്തുമാണ്. ക്രൊയേഷ്യ, നെതർലൻഡ്സ്, ഇറ്റലി, പോർച്ചുഗൽ, സ്പെയിൻ ടീമുകളാണ് ആദ്യ പത്തിലുള്ളത്. രണ്ട് സ്ഥാനം മെച്ചപ്പെടുത്തിയ അമേരിക്ക 13ൽ നിന്ന് 11ൽ എത്തിയതാണ് വലിയ മാറ്റം.
