പ്രഭാസിന്റെ ഗംഭീര തിരിച്ചു വരവ് പ്രതീക്ഷിക്കുന്ന ചിത്രമാണ് പ്രശാന്ത് നീൽ സംവിധാനം ചെയ്യുന്ന ‘സലാർ’. ഈ വർഷം ഏറെ പ്രതീക്ഷയോടെ കാത്തിരിക്കുന്ന ഇന്ത്യൻ ചിത്രങ്ങളിലൊന്നാണിത്. കെജിഎഫിനു ശേഷം പ്രശാന്ത് ഒരുക്കുന്ന ബ്രഹ്മാണ്ഡ ചിത്രം എന്നതാണ് മറ്റൊരു പ്രത്യേകത. കെജിഎഫുമായി സലാറിന് എന്തെങ്കിലും ബന്ധമുണ്ടോ എന്ന് പ്രഖ്യാപനം മുതൽക്കെ ആരാധകർ ഉറ്റുനോക്കുന്നതാണ്. ജൂലൈ 6-ന് സലാറിന്റെ ടീസർ വരുമെന്നും അണിയറ പ്രവർത്തകർ പറഞ്ഞിരുന്നു. ഇപ്പോഴിതാ, സിനിമയുടെ ടീസർ ഇറങ്ങുന്ന സമയമാണ് സമൂഹമാദ്ധ്യമങ്ങളിൽ ചർച്ചാ വിഷയം.
ജൂലെെ 6-ന് പുലർച്ചെ 5.12-നാണ് അണിയറ പ്രവർത്തകർ ടീസർ റിലീസ് ചെയ്യുന്നത്. എന്തുകൊണ്ടാണ് ഇത്ര വെളുപ്പിനെ ടീസർ പുറത്തിറക്കുന്നത് എന്ന് ആരാധകരും ചിന്തിച്ചിരുന്നു. എന്നാൽ ഈ സമയത്തിന് കെജിഎഫുമായി ബന്ധമുണ്ടെന്നാണ് ചിലർ കണ്ടെത്തിയിരിക്കുന്നത്. റോക്കി ഭായിയുടെ കപ്പൽ മുങ്ങിയ സമയമാണ് സലാറിന്റെ ടീസർ റിലീസ് ചെയ്യുന്നതിനായി തിരഞ്ഞെടുത്തിരിക്കുന്നത്. കൗതുകം നിറഞ്ഞ ഈ കണ്ടെത്തലിന്റെ പിന്നാലെയാണ് ആരാധകർ.
കെജിഎഫ് 2-വിൽ റോക്കി ഭായിയുടെ കപ്പല് ആക്രമിക്കപ്പെടുന്നത് പുലർച്ചെ 5 മണിക്കാണെന്ന് സിനിമാ പ്രേമികൾ പറയുന്നു. കപ്പൽ തകർക്കുന്നത് രാവിലെ 5.12 നാണ്. സലാറിൽ പ്രഭാസിനും പൃഥ്വിരാജിനുമൊപ്പം യഷും അതിഥിവേഷത്തിലെത്തുമെന്ന് നേരത്തെ റിപ്പോര്ട്ടുകൾ ഉണ്ടായിരുന്നു. ഇതിനിടെയാണ് പുതിയ കണ്ടെത്തലുകൾ സമൂഹമാദ്ധ്യമങ്ങളിൽ ചർച്ച ചെയ്യപ്പെടുന്നത്. ഹോംബാലെ ഫിലിംസിന്റെ യൂട്യൂബ് ചാനലിലൂടെയാണ് ടീസർ പുറത്തുവിടുന്നത്.
Comments