റേഷൻ കാർഡും ആധാറും ലിങ്ക് ചെയ്യുന്നതിനുള്ള സമയപരിധി നീട്ടി; സൗജന്യമായും ഓൺലൈനായും ലിങ്ക് ചെയ്യാവുന്നതാണ്; അറിയേണ്ടത് ഇത്രമാത്രം

റേഷൻ കാർഡും ആധാർ കാർഡും ലിങ്ക് ചെയ്യാനുള്ള സമയപരിധി നീട്ടി കേന്ദ്രസർക്കാർ. സെപ്തംബർ 30-വരെയാണ് പുതുക്കിയ സമയപരിധി. ദേശീയ ഭക്ഷ്യസുരക്ഷാ നിയമപ്രകാരം സബ്സിഡി നിരക്കിൽ ഭക്ഷ്യധാന്യങ്ങൾ വാങ്ങുന്നതിനായാണ്, അർഹരായ ആളുകൾക്ക് റേഷൻ കാർഡ് നൽകുന്നത്. പലർക്കും റേഷൻ കാർഡുകൾ തിരിച്ചറിയൽ രേഖ കൂടിയാണ്. അതുകൊണ്ടുതന്നെ റേഷൻകാർഡ് ആധാർ കാർഡുമായി ലിങ്ക് ചെയ്യേണ്ടത് നിർബന്ധമാണ്.

റേഷൻ കാർഡും ആധാറും ലിങ്ക് ചെയ്യുന്നതിലൂടെ ഉപഭോക്താക്കൾക്ക് ഒന്നിലധികം റേഷൻ കാർഡുകൾ ഉണ്ടെങ്കിൽ അവ തടയാൻ സാധിക്കും. പ്രധാനമായും വ്യാജകാർഡുകൾ ഇല്ലാതാക്കുവാനാണ് ഇത്തരത്തിൽ ലിങ്ക് ചെയ്യുന്നത്. ഓൺലൈനായും ഓഫ്‌ലൈനായും ആധാർ ലിങ്ക് ചെയ്യാവുന്നതാണ്. സേവനം സൗജന്യമായി ലഭിക്കാൻ അടുത്തുള്ള റേഷൻകടയെ സമീപിച്ചാൽ മതിയാകും. റേഷൻ കടകൾ വഴി ഇപിഒഎസ് മെഷീൻ വഴി നേരിട്ടും, അല്ലെങ്കിൽ താലൂക്ക് സപ്ലൈസ് ഓഫീസുകൾ വഴിയും ആധാർ കാർഡ് റേഷൻ കാർഡുമായി ബന്ധിപ്പിക്കാവുന്നതാണ് .

ഓൺലൈനായി റേഷൻ കാർഡും ആധാർ കാർഡും ലിങ്ക് ചെയ്യുന്ന വിധം

സംസ്ഥാന പൊതുവിതരണ സംവിധാനത്തിന്റെ ഔദ്യോഗിക വെബ്‌സൈറ്റ് സന്ദർശിക്കുക.

ആധാർ കാർഡ് നമ്പർ, റേഷൻ കാർഡ് നമ്പർ, ഉപഭോക്താവിന്റെ രജിസ്റ്റർ ചെയ്ത മൊബൈൽ നമ്പർ ഉൾപ്പെടെയുള്ള വിശദാംശങ്ങൾ നൽകുക.

ശേഷം ‘തുടരുക’ എന്നതിൽ ക്ലിക്ക് ചെയ്യുക.

രജിസ്റ്റർ ചെയ്ത മൊബൈൽ നമ്പറിൽ ഒരു ഒടിപി നമ്പർ ലഭ്യമാകും.

ഒടിപി നൽകി ഉപഭോക്താവിന് റേഷൻ കാർഡും ആധാറും ലിങ്ക് ചെയ്യാവുന്നതാണ്.

ലിങ്കിങ് നടപടികൾ പൂർത്തിയായാൽ പൂർത്തിയായ വിവരം കാണിക്കുന്ന സന്ദേശം ഫോൺ നമ്പറിൽ ലഭിക്കും