തുർക്കിഷ് മെസി, മദ്ധ്യനിരയിലും മുന്നേറ്റ നിരയിലും ഒരുപോലെ മിന്നുന്ന താരം. വയസ് 18 മാത്രം. ട്രാൻസ്ഫർ ലോകത്ത് പൊന്നും വിലയുള്ള താരത്തെ സ്വന്തമാക്കാൻ സ്പാനിഷ് വമ്പന്മാരായ ബാഴ്സയും റയലും മത്സരിച്ച് രംഗത്തെത്തിയെങ്കിലും നറുക്ക് വീണത് റയൽ മാഡ്രിഡിന്. ആർദ ഗുലർ എന്ന യുവ സൂപ്പർതാരമാണ് കഴിഞ്ഞ കുറച്ചു ദിവസങ്ങളായി യുറോപ്യൻ ക്ലബുകളുടെ നോട്ട പുള്ളിയായത്.
ഗുലർ ബാഴ്സയിലേക്ക് ചേക്കേറുമെന്ന് ഏറെക്കുറെ ഉറപ്പായ സാഹചര്യത്തിലായിരുന്നു റയലിന്റെ കടന്നുവരവ്. അവസാന സമയങ്ങളിൽ റയൽ മാഡ്രിഡ് നീക്കങ്ങൾ അതിവേഗത്തിലാക്കുകയായിരുന്നു. താരത്തിന്റെ റിലീസ് ക്ലോസിനെക്കാൾ വലിയൊരു തുക താരത്തിന്റെ ക്ലബ്ബായ ഫെനർബാഷെക്ക് റയൽ വാഗ്ദാനം ചെയ്യുകയായിരുന്നു. 20 മില്യൺ യൂറോയാണ് റയൽ ഓഫർ ചെയ്തിട്ടുള്ളത്. ഫാബ്രിസിയോ റോമാനോ ഉൾപ്പെടെയുള്ളവർ റിപ്പോർട്ട് ചെയ്തിട്ടുണ്ട്.
അടുത്ത 48 മണിക്കൂറിനുള്ളിൽ തന്നെ എല്ലാം പൂർത്തിയാക്കിക്കൊണ്ട് ഓദ്യോഗിക പ്രഖ്യാപനം നടത്താം എന്നാണ് റയൽ പ്രതീക്ഷിക്കുന്നത്.18 കാരനായ താരം കഴിഞ്ഞ സീസണിൽ തകർപ്പൻ പ്രകടനമാണ് നടത്തിയിട്ടുള്ളത്. മദ്ധ്യനിരയിലും മുന്നേറ്റ നിരയിലും എല്ലാ പൊസിഷനിലും ഒരുപോലെ മികച്ച പ്രകടനം നടത്തുന്നതോടെയാണ് താരത്തിന് തുർക്കിഷ് മെസി എന്നുള്ള വിശേഷണം ലഭിച്ചത്.
Comments