യോദ്ധാ എന്ന മോഹൻലാൽ ചിത്രത്തിലൂടെ മലയാളികൾക്ക് പ്രിയങ്കരിയായ നടിയാണ് മാധൂ. തെന്നിന്ത്യയുടെ മുഴുവൻ ജനപ്രീതി താരത്തിന് നേടിക്കൊടുത്തത് റോജാ എന്ന ചിത്രമായിരുന്നു. ഇപ്പോൾ നീണ്ട ഇടവേളയ്ക്ക് ശേഷം വെള്ളിത്തിരയിൽ തിരിച്ചെത്തിയിരിക്കുകയാണ് താരം. തൊണ്ണൂറുകളിലെ നിരവധി സൂപ്പർഹിറ്റ് ചിത്രങ്ങളുടെ ഭാഗമായിരുന്ന മാധൂ വളരെ പെട്ടെന്നാണ് അഭിനയം നിർത്തിയിരുന്നത്. ആരാധകരെ സംബന്ധിച്ചിടത്തോളം അപ്രതീക്ഷിതമായിരുന്നു ആ ഇടവേള. എന്നാൽ എന്തുകൊണ്ടായിരുന്നു സിനിമയിൽ നിന്നുള്ള പിന്മാറ്റമെന്ന് ഇപ്പോൾ വെളിപ്പെടുത്തിയിരിക്കുകയാണ് മാധൂ. അടുത്തിടെ പുറത്തിറങ്ങിയ അവരുടെ അഭിമുഖത്തിലാണ് വെളിപ്പെടുത്തൽ.
തമിഴിലെ റോജയിലും കന്നഡയിലെ അന്നയ്യയിലും മലയാളത്തിലെ യോദ്ധയിലുമെല്ലാം വളരെ നല്ല കഥാപാത്രങ്ങൾ അവതരിപ്പിക്കാൻ കഴിഞ്ഞിരുന്നു. പിന്നീട് മുംബൈയിലേക്ക് താമസം മാറ്റി. ബോളിവുഡ് ചിത്രങ്ങളുടെ ഭാഗമായി. എല്ലാ സിനിമകളിലും ആക്ഷൻ ഹീറോകൾക്കായിരുന്നു ലീഡ്. തൊണ്ണൂറുകളിൽ അങ്ങനെത്തന്നെയാണല്ലോ.. അതിലെനിക്ക് പരാതിയില്ല. ഒരുപാട് ചിത്രങ്ങൾക്ക് വേണ്ടി ഞാൻ നൃത്തം ചെയ്തു. നൃത്തം എനിക്ക് വളരെ ഇഷ്ടവുമാണ്. പക്ഷെ റോജ പോലെ ഒരു സിനിമയിൽ വളരെ നല്ല കഥാപാത്രം ചെയ്തതിന് ശേഷം ഇത്തരം വേഷങ്ങൾ ചെയ്യേണ്ടി വന്നതിൽ ഒരുപാട് നിരാശ തോന്നി. ഷൂട്ടിംഗ് തീയതികൾ അടുക്കുമ്പോൾ തന്നെ സന്തോഷമെല്ലാം പോകുന്ന അവസ്ഥയായി. അങ്ങനെയാണ് സിനിമയിൽ നിന്ന് പിൻവാങ്ങാൻ തീരുമാനിച്ചത്.
ഇവരാരും തന്നെ എന്റെ സാന്നിധ്യം അർഹിക്കുന്നില്ലെന്ന് എനിക്ക് തോന്നി. എന്നാൽ അത് ചെറുപ്രായത്തിലെ അഹങ്കാര മനോഭാവമായിരുന്നു എന്ന് ഞാൻ പിന്നീട് തിരിച്ചറിഞ്ഞു. ഞാനൊരു കലാകാരിയാണ്. അതുകൊണ്ട് തിരിച്ചുവരാൻ തീരുമാനിക്കുകയായിരുന്നു. – മാധൂ പറഞ്ഞു.
അടുത്തിടെയാണ് സമാന്ത റൂത്ത് പ്രഭു നായികയായെത്തിയ ശാകുന്തളം എന്ന ചിത്രത്തിൽ മേനകയുടെ കഥാപാത്രത്തെ മാധൂ അവതരിപ്പിച്ചത്. അതിന് ശേഷം തമിഴ് വെബ് ഷോ ആയ ‘സ്വീറ്റ് കരം കോഫി’യിലും അവർ എത്തി.
