മൈക്രോസോഫ്റ്റിന്റെ മോസ്റ്റ് വാല്യുബിൾ പ്രൊഫഷണൽ അവാർഡ് സ്വന്തമാക്കി കോഴിക്കോട് സ്വദേശി മുഹമ്മദ് അൽഫാൻ. രണ്ടാം തവണയാണ് തുടർച്ചയായി മുഹമ്മദ് അൽഫാൻ മൈക്രോസോഫ്റ്റിന്റെ അംഗീകാരം കരസ്ഥമാക്കുന്നത്. ഡാറ്റ അനലിസ്റ്റ് ആയ മുഹമ്മദ് കുറ്റിച്ചിറ സ്വദേശിയാണ്.
സാങ്കേതിക വൈദഗ്ധ്യവും അറിവും മറ്റുള്ളവർക്ക് പങ്കിടുന്നതിനായി തയ്യാറാകുന്ന സാങ്കേതിക വിദഗ്ധർക്ക് മൈക്രോസോഫ്റ്റ് നൽകുന്ന അംഗീകാരമാണ് മോസ്റ്റ് വാല്യുബിൾ പ്രൊഫഷണൽ അവാർഡ്. ഡാറ്റ അനലിസ്റ്റ് കാറ്റഗറിയിൽ ഇന്ത്യയിൽ ഇതുവരെ നാല് പേർക്ക് മാത്രമാണ് ഈ അവാർഡ് സ്വന്തമാക്കാൻ സാധിച്ചിട്ടുള്ളത്. മൈക്രോസോഫ്റ്റിന്റെ 365 ആപ്ലിക്കേഷൻ വിഭാഗത്തിലാണ് അൽഫാന് അവാർഡ് ലഭിച്ചത്.
ഇന്ത്യയിലെ ജുവനൈൽ ഹോമുകൾ, ബെംഗളൂരു നഗരത്തിലെ ഉന്നത സ്ഥാപനങ്ങൾ, മിഡിൽ ഈസ്റ്റിലെ അജ്മാൻ യൂണിവേഴ്‌സിറ്റി, ഖലീഫ യുണിവേഴ്‌സിറ്റി, ഖത്തർ യൂണിവേഴ്‌സിറ്റി വിദ്യാർത്ഥികൾക്കും അദ്ധ്യാപകർക്കും ഡാറ്റ അനലിറ്റിക്‌സിൽ ഇദ്ദേഹം പരിശീലനം നൽകാറുണ്ട്. ഇത് സംബന്ധിച്ച് അൽഫാന്റെ പേര് യുഎസിലെ മൈക്രോസോഫ്റ്റ് ആസ്ഥാനത്തെ എംപി വാളിൽ പ്രസിദ്ധീകരിച്ചിട്ടുണ്ട്. കൂടാതെ ഡാറ്റ അനലിറ്റിക്‌സ് സംബന്ധിച്ച് ഇദ്ദേഹം എഴുതി തയാറാക്കിയ പുസ്തകം ചെന്നൈയിലെ മദ്രാസ് ക്രിസ്ത്യൻ കോളേജിലെ ബിബിഎ ടെസ്റ്റ് ബുക്ക് ആയി ഉപയോഗിക്കുന്നുണ്ട്.
Comments