തിരുവനന്തപുരം: രാജ്യത്ത് ഏകീകൃത സിവിൽ കോഡ് നടപ്പാക്കണമെന്ന് എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശൻ. എസ്എൻഡിപി മുഖപത്രമായ യോഗനാദത്തിലൂടെയാണ് വെള്ളാപ്പിള്ളി നിലപാട് വ്യക്തമാക്കിയത്. ഏകീകൃത സിവിൽ കോഡ് പ്രാബല്യത്തിൽ വന്നാൽ നീതിന്യായ സംവിധാനം കൂടുതൽ കാര്യക്ഷമമാകുമെന്ന് ചൂണ്ടിക്കാട്ടിയ വെള്ളാപ്പള്ളി, യുസിസി നടപ്പാക്കരുതെന്ന് പറയുന്നവരുടെ ഉദ്ദേശ്യലക്ഷ്യങ്ങൾ മറ്റ് പലതാണെന്നും കുറ്റപ്പെടുത്തി.
വ്യക്തിനിയമങ്ങളെ അടിസ്ഥാനമാക്കി രാജ്യത്തുണ്ടാകുന്ന ലക്ഷക്കണക്കിന് കേസുകൾ ഇല്ലാതാകും. വ്യവഹാരം ലളിതമാകും. സങ്കീർണ വ്യക്തിനിയമങ്ങൾ മൂലം വർഷങ്ങളോളം നീതിക്ക് വേണ്ടി ജനങ്ങൾ കാത്തുകെട്ടി കിടക്കുന്ന ആവശ്യമില്ലാതെയാകുമെന്നും യോഗനാദത്തിൽ സൂചിപ്പിക്കുന്നു. യുസിസി പ്രാബല്യത്തിൽ വന്നാൽ സ്ത്രീകൾക്കാണ് ഏറ്റവും ഗുണം. വ്യക്തിനിയമം മൂലം ഇരകളാകുന്നത് സ്ത്രീകളാണ്. യുസിസിയെ പ്രധാനമായും എതിർക്കുന്ന മുസ്ലീം വിഭാഗത്തിലെ ചിലരാണെന്നും വെള്ളാപ്പള്ളി നടേശൻ ചൂണ്ടിക്കാട്ടി.
Comments