മലയാളികളുടെ ജനപ്രിയ നായകനെ പഴയതുപോലെ തന്നെ ഓഫ് സ്ക്രീനിൽ തിരികെ ലഭിച്ചതിന്റെ സന്തോഷത്തിലാണ് ആരാധകർ. രസികനായ നടനെ ഇത്രയും നാളുകളായി കാണാതിരുന്നതിൽ നിരവധി ആരാധകരാണ് പരിഭവം പറഞ്ഞത്. എന്നാൽ ഇപ്പോഴിതാ പുതിയ ചിത്രമായ വോയിസ് ഓഫ് സത്യനാഥന്റെ പ്രൊമോഷൻ ചടങ്ങുകളിൽ പങ്കെടുത്ത ദിലീപിന്റെ വീഡിയോ ആണ് സമൂഹമാദ്ധ്യമങ്ങളിൽ വൈറലായിരിക്കുന്നത്. ദിലീപിന്റെ ഏറ്റവും അടുത്ത സുഹൃത്തുക്കളിൽ ഒരാളായിരുന്നു കലാഭവൻമണി. ഇപ്പോഴിതാ, കലാഭവൻ മണിയുമൊത്തുള്ള ഓർമ്മകൾ പങ്കുവെച്ചിരിക്കുകയാണ് താരം.
താരത്തിന്റെ വാക്കുകൾ…
മണി ഞങ്ങളുടെ ചങ്കൂറ്റമായിരുന്നു. മണിയെ ആദ്യം കാണുന്നത് ആലുവ പാലസിൽ വെച്ചാണ്. ഒരു ഷോയ്ക്ക് പോകവെ. പിന്നെ സിനിമയിൽ ശരിക്കും കാണുന്നത് സല്ലാപത്തിന്റെ സമയത്താണ്. ലോഹി സാർ പറഞ്ഞ് സിനിമയുടെ കഥ എനിക്ക് അറിയാം. ശ്രദ്ധേയ വേഷമാണ് മണിക്ക് എന്ന് ഞാനവനോട് പറഞ്ഞു. ആ സിനിമയോടെ ഞങ്ങൾ ഭയങ്കര അടുപ്പമായി. ഏകദേശം 2010 വരെ ഞാൻ പോയ എല്ലാ വിദേശ ഷോകളിലും മണിയുണ്ട്.
മണിയും നാദിർഷയും ഇല്ലാതെ ഞാനെങ്ങും പോയിട്ടില്ല. അത്രയും സഹോദര ബന്ധമായിരുന്നു. ഷോയ്ക്കൊക്കെ പോകുമ്പോൾ മണി കഞ്ഞിയും ചോറുമൊക്കെ വെക്കും. മണി നമുക്ക് ഭക്ഷണം കുഴച്ച് വായിൽ തരും. അവൻ ഭയങ്കര കൈപ്പുണ്യമുള്ള ആളായിരുന്നു. നല്ല കഴിവുമുണ്ട്. മലയാള സിനിമ അവനെ ശരിക്കും ഉപയോഗിച്ചിട്ടില്ല. പെട്ടെന്ന് അവൻ വിട്ടുപോയി. ഇപ്പോഴും ഞങ്ങൾ ഷോ ചെയ്യുമ്പോൾ സ്റ്റേജിൽ മണിയുണ്ട് എന്ന ഫീൽ ഉണ്ടാക്കും. ഒരിക്കൽ സിനിമയിൽ ഞാനും മണിയും കൂടി ഒരു ഷോട്ട് ചെയ്യുന്നതിന് മുമ്പ് ഒരു തമാശ പറഞ്ഞു. രണ്ട് പേരും ചിരി തുടങ്ങി. അവസാനം ഷൂട്ടിംഗ് നിർത്തി വെച്ചു. ഞങ്ങൾ ചിരി നിർത്തുന്നില്ല. അവസാനം വിനയേട്ടന് ഭ്രാന്തായി. നിങ്ങൾ എന്താണീ കാണിക്കുന്നതെന്ന് ചോദിച്ചു. ക്യാമറ ഓഫ് ചെയ്യൂ, ഇവർ ചിരി നിർത്തട്ടെ എന്ന് പറഞ്ഞു. ഇത് കേട്ടപ്പോൾ പിന്നെയും ചിരിച്ചു.
പ്രണയനിലാവ്, വാർ ആന്റ് ലൗ തുടങ്ങിയ വിനയൻ ചിത്രങ്ങളിൽ ദിലീപും കലാഭവൻ മണിയും ഒരുമിച്ച് അഭിനയിച്ചിട്ടുണ്ട്. 2016 മാർച്ചിലായിരുന്നു കലാഭവൻ മണിയുടെ വിയോഗം.
