ഷവര്‍ ജെല്ലും ബോഡി വാഷുമൊക്കെ വന്നു എന്ന്‌ പറഞ്ഞാലും ഇപ്പോഴും സോപ്പ് ഉപയോഗിച്ചാണ് മിക്കവരും കുളിക്കുന്നത്. അതുകൊണ്ട് തന്നെ കുളിക്കുമ്പോള്‍ എല്ലാവരും ഒരേ സോപ്പ് തന്നെ ഉപയോഗിക്കാനുള്ള സാധ്യത ഏറെയാണ്. എന്നാൽ, പലർക്കും അറിയാത്ത ഒരു കാര്യമാണ് ഒരേ സോപ്പ് ഉപയോഗിച്ച് നിരവധി ആളുകള്‍ കുളിച്ചാല്‍, സോപ്പില്‍ ബാക്ടീരിയയും മറ്റ് സൂക്ഷ്മാണുക്കളും വളരുമെന്നുള്ളത്. ഇത് ചര്‍മ്മ അണുബാധകളിലേക്കും മറ്റ് രോഗങ്ങളിലേക്കും നയിച്ചേക്കാം. കുളിക്കാന്‍ സോപ്പ് ഉപയോഗിക്കുമ്പോള്‍ ശ്രദ്ധിക്കേണ്ട കാര്യങ്ങള്‍ എന്തെല്ലാമെന്ന് നോക്കാം.
കുളിക്കുമ്പോള്‍ നിങ്ങള്‍ സ്വന്തം സോപ്പ് ഉപയോഗിക്കുന്നതാണ് നല്ലത്. നിങ്ങളുടെ സോപ്പ് മറ്റൊരാള്‍ ഉപയോഗിച്ചാല്‍ ഇത് ചര്‍മ്മ പ്രശ്‌നങ്ങള്‍ക്ക് കാരണമാകും. അതുപോലെ തന്നെ താരന്‍ പോലെയുള്ള സൗന്ദര്യ പ്രശ്‌നങ്ങളും ഉണ്ടാകും. സോപ്പ് പെട്ടിയില്‍ അടച്ച് വെച്ച് ഉപയോഗിക്കുന്നതാണ് ഏറ്റവും നല്ലത്.
കുളി കഴിഞ്ഞാൽ സോപ്പ് കഴുകി തന്നെ വെയ്‌ക്കണം. സോപ്പിലെ ജലാംശം വറ്റിയതിന് ശേഷമായിരിക്കണം അടച്ച് വെയ്‌ക്കേണ്ടത്. ഇല്ലെങ്കിൽ വീണ്ടും സോപ്പ് ഉപയോഗിക്കുമ്പോൾ അണുക്കൾ ശരീരത്തിലേക്ക് പ്രവേശിക്കാൻ സാധ്യതയുണ്ട്.
ചര്‍മ്മ രോഗങ്ങള്‍ ഉള്ളവരുടെ സോപ്പ് ഒരിക്കലും ഉപയോഗിക്കാന്‍ പാടുള്ളതല്ല. പ്രത്യേകിച്ച് ഇത്തരം സോപ്പ് ഉപയോഗിച്ച് കുട്ടികളെ കുളിപ്പിക്കരുത്. രോഗികള്‍ ഉപയോഗിക്കുന്ന സോപ്പ് മാറ്റി വെക്കാന്‍ പ്രത്യേകം ശ്രദ്ധിക്കണം. നല്ല ഹെല്‍ത്തിയായിട്ട് കുളിക്കുന്ന ശീലം വളര്‍ത്താന്‍ സോപ്പിനേക്കാള്‍ നല്ലത് ബോഡി വാഷാണ്.
Comments