വെബ് സീരീസ് പ്രവർത്തകർക്ക് സന്തോഷ വാർത്ത. അന്താരാഷ്‌ട്ര ചലച്ചിത്ര മേളയിൽ ഇനി മികച്ച വെബ് സീരിസ് എന്ന വിഭാഗവും ഉൾപ്പെടുത്താൻ പോകുന്നു. കേന്ദ്രമന്ത്രി അനുരാഗ് ഠാക്കൂർ ആണ് ഈ വിഭാഗവും മേളയിൽ ഉൾപ്പെടുത്തുമെന്ന് പ്രഖ്യാപിച്ചത്.
‘ ഗോവ അന്താരാഷ്‌ട്ര ചലച്ചിത്ര മേളയിൽ മികച്ച വെബ് സീരീസ് എന്ന വിഭാഗം ഉൾപ്പെടുത്തുന്നു എന്നത് സന്തോഷപൂർവ്വം അറിയിക്കുന്നു. തിരക്കഥ, ടെക്‌നിക്കൽ എന്നീ മേഖലകൾ പരിഗണിച്ചാകും സീരീസ് തിരഞ്ഞെടുക്കുന്നത്. മികച്ച പ്രതിഭകളാൽ നിറഞ്ഞ രാജ്യമാണ് ഇന്ത്യ. കുതിച്ചുയരുന്ന രാജ്യത്തെ കുറിച്ചുള്ള കഥകൾ നിങ്ങൾ പറയാൻ ഞാൻ ആഗ്രഹിക്കുന്നു. ഒരുപാട് സ്വപ്‌നങ്ങളും ഇതുവരെ പറയാത്ത കഥകളുമായി ലോകത്തെ നയിക്കാൻ നിങ്ങൾ തയാറെടുക്കുക.’ -അനുരാഗ് ഠാക്കൂർ ട്വീറ്റ് ചെയ്തു.
ഏതെങ്കിലും ഒടിടി പ്ലാറ്റ്‌ഫോമിൽ റിലീസ് ചെയ്തതും ഇന്ത്യൻ ഭാഷയിൽ നിർമ്മിച്ചതുമായ ചിത്രങ്ങൾക്കാകും പുരസ്‌കാരം ലഭിക്കുക.
‘ ഇന്ത്യയിലെ ഒടിടി മേഖലയിൽ മികച്ച അവസരങ്ങൾ കൊണ്ടുവരിക എന്നതാണ് ലക്ഷ്യം. ഇന്ത്യൻ ഭാഷയിൽ കൂടുതൽ കണ്ടന്റ് ഒരുക്കുക, മികച്ച പ്രതികളെ കണ്ടെത്തുന്നതിന് ഒപ്പം ഒടിടി മേഖലയുടെ വളർച്ചയെയും സഹായിക്കുക എന്നിവ ഇതിലൂടെ സാദ്ധ്യമാകും. 54-ാം അന്താരാഷ്‌ട്ര ചലച്ചിത്ര മേള മുതൽ തുടർന്നുള്ള വർഷങ്ങളിൽ ഈ പുരസ്‌കാരം നൽകും.’- മന്ത്രി പറഞ്ഞു.
അതേസമയം ഐഎഫ്എഫ്‌ഐയിൽ ഇന്ത്യൻ പനോരമ വിഭാഗത്തിൽ പ്രദർശിപ്പിക്കേണ്ട ഫീച്ചർ, നോൺ ഫീച്ചർ ചിത്രങ്ങളുടെ എൻട്രിക്ക് വേണ്ടിയുള്ള ക്ഷണം ദേശീയ ഫിലിം ഡെവലപ്പ്‌മെന്റ് കോർപ്പറേഷൻ പുറത്തിറക്കിയിട്ടുണ്ട്. നവംബർ 20 മുതൽ 28 വരെ ഈ വർഷം ഐഎഫ്‌ഐഎഫ്‌ഐ നടക്കും.
Comments