ഡ്യൂറൻഡ് കപ്പ് സംപ്രേക്ഷണാവകാശം സ്വന്തമാക്കി സോണി

2023 നും 2024 നും ഇടയിൽ ഇന്ത്യയിൽ നടക്കുന്ന ഡ്യൂറൻഡ് കപ്പ് സംപ്രേക്ഷണം ചെയ്യുന്നതിനുള്ള എക്സ്‌ക്ലൂസീവ് മീഡിയ അവകാശം സോണി പിക്ചേഴ്സ് നെറ്റ്വർക്ക്‌സ് ഇന്ത്യ സ്വന്തമാക്കി. കരാറിന്റെ ഭാഗമായി, അടുത്ത രണ്ട് വർഷവും ഡ്യൂറൻഡ് കപ്പ ഫുട്‌ബോൾ ടൂർണമെന്റ് സോണിയിൽ ലഭ്യമാകും. സോണി സ്പോർട്സ് ടെൻ, 2 ചാനലുകളിൽ ആരാധകർക്ക് ടൂർണമെന്റ് തത്സമയം കാണാനാകും, കൂടാതെ മത്സരങ്ങൾ സോണിയുടെ ഒടിടി പ്ലാറ്റ്ഫോമായ സോണി ലൈവിൽ ഓൺലൈനായും കാണാൻ സാധിക്കും.

ഡ്യൂറൻഡ് കപ്പിന്റെ 132-ാമത് പതിപ്പിന് ഓഗസ്റ്റ് 3 ന് തുടക്കമാകും, കൂടാതെ 24 ടീമുകൾ തമ്മിലുള്ള മൊത്തം 43 മത്സരങ്ങൾക്ക് സാക്ഷ്യം വഹിക്കും. അസം, മേഘാലയ, പഞ്ചിമബംഗാൾ എന്നിവിടങ്ങളിലെ നാല് വേദികളിലായാണ് ടൂർണമെന്റ് നടക്കുന്നത്.

1888ൽ ആരംഭിച്ച ഡ്യൂറൻഡ് കപ്പ് ഏഷ്യയിലെ ഏറ്റവും പഴക്കമേറിയതും ലോകത്തിലെ മൂന്നാമത്തെ ഏറ്റവും പഴക്കമുള്ളതുമായ ഫുട്‌ബോൾ ടൂർണമെന്റാണ്. 1888ലെ ഇന്ത്യാ ഗവൺമെന്റിന്റെ വിദേശകാര്യ സെക്രട്ടറിയായിരുന്ന സർ ഹെൻറി മോർട്ടിമറാണ് ഡ്യൂറൻഡ് കപ്പ് ആരംഭിച്ചത്. ഇന്ത്യൻ സൂപ്പർ ലീഗിലെ എല്ലാ ടീമുകളും മുൻനിര ഐ-ലീഗ്, മറ്റ് ഡിവിഷൻ ക്ലബ്ബുകളും തമ്മിൽ മത്സരിക്കുന്ന ഇന്ത്യയിലെ ഏക ടൂർണമെന്റാണ് ഡ്യൂറൻഡ് കപ്പ്.

നേപ്പാളിലെയും ബംഗ്ലാദേശിലെയും ആർമി ടീമുകൾ 27 വർഷത്തെ ഇടവേളയ്‌ക്ക് ശേഷം ഇത്തവണത്തെ ഡ്യൂറൻഡ് കപ്പിൽ പങ്കെടുക്കുന്നതിനാൽ വിദേശ ടീമുകളുടെ പങ്കാളിത്തവും ഈ വരാനിരിക്കുന്ന പതിപ്പിൽ ഉണ്ടാകും.മോഹൻ ബഗാൻ സൂപ്പർ ജയന്റും ഈസ്റ്റ് ബംഗാളും തമ്മിലുള്ള ലോകത്തിലെ ഏറ്റവും വലിയ ഫുട്‌ബോൾ ഡെർബികളിലൊന്നായ കൊൽക്കത്ത ഡെർബിയുടെ ഒന്നിലധികം പ്രാദേശിക മത്സരങ്ങളും കേരള ബ്ലാസ്റ്റേഴ്സും ഗോകുലം കേരളയും തമ്മിലുള്ള കേരള ഡെർബിയും വരാനിരിക്കുന്ന ടൂർണമെന്റിൽ ആരാധകർ പ്രതീക്ഷയോടെ കാത്തിരിക്കുന്ന പോരാട്ടമാണ്.