ന്യൂഡൽഹി: കേരളത്തിൽ നിന്നുളള ഫുട്ബോൾ ക്ലബ്ബായ ഗോകുലം കേരള എഫ്സിയുടെ വനിത ടീമിന് 2023 ലെ ഏഷ്യൻ ഫുട്ബോൾ കോൺഫെഡറേഷന്റെ എഎഫ്സി വനിതാ ചാമ്പ്യൻഷിപ്പ് കളിക്കാൻ അനുമതി. 2022-2023 സീസണിലെ ചാമ്പ്യൻമാരാണ് ഗോകുലം കേരള. ഇതിന്റെ അടിസ്ഥാനത്തിൽ എഐഎഫ്എഫ് എഎഫ്സിക്ക് നൽകിയ അപേക്ഷയുടെ അടിസ്ഥാനത്തിലാണ് നടപടി.
എഐഎഫ്എഫ് പ്രസിഡന്റ് കല്യാൺ ചൗബേ, സെക്രട്ടറി ജനറൽ ഷാജി പ്രഭാകരൻ എന്നിവരുടെ നേതൃത്വത്തിൽ ഡൽഹിയിൽ വിളിച്ചുച്ചേർത്ത യോഗത്തിലാണ് ഗോകുലം കേരള എഫ്സിയുടെ വനിത ടീം ചാമ്പ്യൻഷിപ്പിൽ പങ്കെടുക്കുമെന്ന വിവരം അറിയിച്ചത്.
യോഗത്തിൽ ഐലീഗും ഐഡബ്ല്യൂയു ലീഗും കൂടുതൽ ആകർഷകമാകുന്നതിനും കൂടുതൽ കാലം നീണ്ടുനിൽക്കുന്ന തരത്തിലേക്ക് ലീഗിനെ മാറ്റുന്നതിന് വേണ്ടി നടപടികളും യോഗത്തിൽ ചർച്ച ചെയ്തു. ചിലപ്പോൾ ഐലീഗിലും മാറ്റങ്ങൾ സംഭവിച്ചേക്കാം.
മത്സരത്തിനുളള വേദികളുടെ നിലവാരം മെച്ചപ്പെടുത്തുന്നതിനോടൊപ്പം മത്സരങ്ങളുടെ സംപ്രേക്ഷണം മെച്ചപ്പെടുത്താനും എഐഎഫ്എഫ് ആലോചിക്കുന്നുണ്ട്. വിദേശ താരങ്ങളെ ടീമിലെടുക്കുന്ന നിബന്ധനകളിൽ മാറ്റം വരുത്തേണ്ടതില്ലെന്നും യോഗത്തിൽ തീരുമാനമായി.
