എറണാകുളം: കൊച്ചി മെട്രോയിൽ വിദ്യാർത്ഥികൾക്ക് ഇനി മുതൽ കുറഞ്ഞ നിരക്കിൽ യാത്ര ചെയ്യാം. വിദ്യ – 45 എന്ന പേരിൽ പുതിയ ട്രാവൽ കാർഡ് കെ.എം.ആർ.എൽ പുറത്തിറക്കി. നിർമ്മാതാവായ സാന്ദ്രാ തോമസിന്റെ മക്കളായ കെയ്റ്റ്ലിനും കെൻഡലും ചേർന്ന് സ്കൂൾ വിദ്യാർത്ഥികൾക്ക് പാസ് നൽകി ഉദ്ഘാടനം ചെയ്തു.
50 രൂപയുടെ വിദ്യ-1, 900 രൂപയുടെ വിദ്യ-30 പാസുകൾക്ക് പുറമെയാണ് പുതിയ പാസ് മെട്രോ പുറത്തിറക്കിയിരിക്കുന്നത്. നടിയും നിർമ്മാതാവുമായ സാന്ദ്ര തോമസിന്റെ മക്കളായ കെയ്റ്റ്ലിനും കെൻഡലുമാണ് സ്കൂൾ വിദ്യാർത്ഥികൾക്ക് വിദ്യ -45 ന്റെ പാസ് വിദ്യാർത്ഥികൾക്ക് സമ്മാനിച്ച് പദ്ധതി ഉദ്ഘാടനം ചെയ്തത്.
കൊച്ചി മെട്രോയെ ആശ്രയിക്കുന്ന വിദ്യാർത്ഥികളുടെ എണ്ണം വർദ്ധിച്ചതോടെയാണ് പുതിയ പദ്ധതിയുമായി മെട്രോ രംഗത്തെത്തിയത്. കുറഞ്ഞ നിരക്കിൽ വിദ്യാർത്ഥികളുടെ യാത്ര സാധ്യമാകുക എന്ന ഉദ്ദേശ്യത്തോടെ ഈ കാർഡ് ഉപയോഗിച്ച് 45 ദിവസത്തിനകം ഒരു വിദ്യാർത്ഥിക്ക് 50 യാത്ര നടത്താനാകും. ഏത് മെട്രോ സ്റ്റേഷനിൽ നിന്നും യാത്ര ചെയ്യാവുന്ന പുതിയ ട്രാവൽ കാർഡിന്റെ നിരക്ക് 495 രൂപയാണ്.
വിദ്യ-45 പാസ് ഉപയോഗിക്കുന്ന വിദ്യാർത്ഥികൾക്ക് ഒരു തവണ യാത്ര ചെയ്യാൻ 10 രൂപ മതിയെന്നതും ശ്രദ്ധേയമാണ്. മെട്രോ സ്റ്റേഷനുകളിൽ നിന്ന് കാർഡിന്റെ വാലിഡിറ്റി തീരുന്നതിനനുസരിച്ച് റീചാർജ്ജ് ചെയ്ത് ഉപയോഗിക്കാവുന്നതാണ്. സ്കൂൾ/ കോളേജിൽ നിന്നുളള ഐഡി കാർഡിന്റെ കോപ്പിയിലൂടെ ട്രാവൽ പാസ് സ്വന്തമാക്കാനാവും. 25 വയസ്സിന് താഴെയുളള വിദ്യാർത്ഥികളെയാണ് പദ്ധതിയിലൂടെ ലക്ഷ്യമിടുന്നത്. 25 വയസ്സിന് മുകളിലുള്ള വിദ്യാർത്ഥികൾക്ക് കോച്ചിംഗ് സെന്ററുകളിലെ അധികൃതരിൽ നിന്ന് ഫോട്ടോ പതിച്ച സത്യവാങ്മൂലം സമർപ്പിച്ചും പാസ് വാങ്ങാൻ സാധിക്കും.
