“നാം ഇന്ന് യാത്ര ചെയ്യുന്നത് കാർഗിൽ ഹീറോയോടൊപ്പം”; വൈറലായി പൈലറ്റിന്റെ വാക്കുകൾ; പരംവീർ ചക്ര ജേതാവിനെ ആദരിച്ച് ഇൻഡിഗോ

വിമാനം പുറപ്പെടുന്നതിന് മുമ്പ് പൈലറ്റുമാർ അനൗൺസ്‌മെന്റ് നടത്തുകയെന്നത് പതിവ് സംഭവമാണ്. ഇത്തരത്തിൽ ഇൻഡിഗോ പൈലറ്റ് നടത്തിയ അനൗൺസ്‌മെന്റാണ് ഇന്റർനെറ്റ് ലോകത്തിന്റെ ശ്രദ്ധ പിടിച്ചുപറ്റുന്നത്. പൂനെയിലേക്ക് പോകുകയായിരുന്ന ഇൻഡിഗോ വിമാനത്തിലായിരുന്നു സംഭവം.

രാജ്യം പരംവീർ ചക്ര പുരസ്‌കാരം നൽകി ആദരിച്ച സുബേദാർ മേജർ സഞ്ജയ് കുമാറും അന്നേദിവസം അവരുടെ വിമാന യാത്രയ്‌ക്ക് ഒപ്പമുണ്ടായിരുന്നു. കാർഗിൽ യുദ്ധത്തിൽ പോരാടി ഇന്ത്യയ്‌ക്ക് അഭിമാനമായ സഞ്ജയ് കുമാറിന് ഊഷ്മള വരവേൽപ്പ് നൽകിയായിരുന്നു ഇൻഡിഗോ ആദരിച്ചത്. നമ്മോടൊപ്പം വേണ്ടപ്പെട്ട ഒരാൾ കൂടി യാത്ര ചെയ്യുന്നുണ്ടെന്നറിയിച്ച പൈലറ്റ്, മേജർ സഞ്ജയ് കുമാറിന്റെ ധീരതയെക്കുറിച്ച് വിശദീകരിച്ചു.

“ഇന്ന് വിശിഷ്ടനായ ഒരു വ്യക്തി നമ്മോടൊപ്പം യാത്ര ചെയ്യുന്നുണ്ട്. പരംവീർ ചക്ര പുരസ്‌കാര ജേതാവായ സുബേദാർ മേജർ സഞ്ജയ് കുമാർ. ഈ പുരസ്‌കാരത്തെക്കുറിച്ച് അറിയാത്തവർക്കായി പറയാം.. ഇന്ത്യയുടെ ചരിത്രത്തിൽ തന്നെ ഇതുവരെ 21 പേർക്ക് മാത്രം ലഭിച്ചിട്ടുള്ള പുരസ്‌കാരമാണിത്. യുദ്ധകാലത്തെ സേവനങ്ങൾ പരിഗണിച്ച് സൈനികർക്ക് നൽകുന്ന പരമോന്നത ബഹുമതിയാണ് പരംവീർ ചക്ര. അതുകൊണ്ട് നാമിന്ന് ഒരു ഹീറോയോടൊപ്പമാണ് യാത്ര ചെയ്യുന്നത്.” ഇതായിരുന്നു പൈലറ്റിന്റെ വാക്കുകൾ. തൊട്ടുപിന്നാലെ വിമാനജീവനക്കാരി എത്തി അദ്ദേഹത്തിന് ഉപഹാരം നൽകി ആദരിക്കുകയും ചെയ്തു. സംഭവത്തിന്റെ ദൃശ്യങ്ങൾ ഇൻഡിഗോയുടെ ഔദ്യോഗിക ട്വിറ്റർ പേജിലാണ് പങ്കുവച്ചിരിക്കുന്നത്.

Flying with a hero: Subedar Major Sanjay Kumar ji, a Living Param Veer Chakra awardee! #goIndiGo #IndiaByIndiGo pic.twitter.com/CZsqlHxRj6

— IndiGo (@IndiGo6E) July 23, 2023

“>