വടക്കാഞ്ചേരിയിൽ രണ്ട് ട്രെയിനുകൾക്ക് നേരെ കല്ലേറ്

തൃശ്ശൂർ: വടക്കാഞ്ചേരിയിൽ ട്രെയിനുകൾക്ക് നേരെ കല്ലേറ്. കല്ലേറിൽ എറണാകുളം- ബെംഗളൂരു എക്‌സ്പ്രസിന്റെ ചില്ലുകൾ തകർന്നു. ഷൊർണ്ണൂർ ഭാഗത്ത് നിന്ന് വരികയായിരുന്ന ട്രെയിനിന് നേരെ വടക്കാഞ്ചേരിയിൽ വച്ചാണ് കല്ലെറിഞ്ഞത്. കല്ലേറിൽ ട്രെയിനിന്റെ ഗ്ലാസുകൾക്ക് നാശനഷ്ടം സംഭവിച്ചു. നാഗർകോവിൽ മാംഗ്ലൂർ എക്‌സ്പ്രസിന് നേരെയും ആക്രമണം നടന്നിരുന്നു. എങ്കക്കാട് റെയിൽവേ ഗേറ്റ് പരിസരത്ത് വെച്ചാണ് ആക്രമണം നടന്നതെന്ന് യാത്രക്കാർ വടക്കാഞ്ചേരി പോലീസിന് വിവരം നൽകി. സംഭവത്തിൽ പോലീസ് അന്വേഷണം ആരംഭിച്ചു.

കഴിഞ്ഞ ദിവസം ഭോപ്പാലിൽ നിന്ന് ഡൽഹി നിസ്സാമുദ്ദീനിലേക്ക് പുറപ്പെട്ട വന്ദേഭാരത് എക്‌സ്പ്രസിന് നേരെയും കല്ലേറ് നടന്നിരുന്നു. ആഗ്രയിൽ വെച്ചാണ് കല്ലേറുണ്ടായത്. സംഭവത്തിൽ ട്രെയിനിന്റെ ഗ്ലാസ് തകർന്നിരുന്നു. സി-7 കോച്ചിന്റെ 13-14 സീറ്റ് നമ്പർ ജനൽ ഗ്ലാസാണ് തകർന്നത്. ആഗ്ര റെയിൽവേ ഡിവിഷന് മാനിയ , ജാജൗ സ്റ്റേഷനുകൾക്കിടയിൽ വച്ചായിരുന്നു സംഭവം.