വീണ്ടും പുതിയ കൊറോണ വകഭേദം; യുകെയിൽ ഭയം വിതച്ച് ‘എറിസ്’ വ്യാപനം രൂക്ഷം

ലണ്ടൻ: യു.കെയിൽ പടർന്ന് പിടിച്ച് പുതിയ ഒമിക്രോൺ വകഭേദമായ ഇജി 5.1. യുകെയിലെ ഹെൽത്ത് സെക്യൂരിറ്റി ഏജൻസി മുന്നറിയിപ്പ് നൽകിയിട്ടുള്ള ‘എറിസ്’ എന്നു വിളിക്കുന്ന ഈ വകഭേദമാണ് ഇപ്പോൾ ആരോഗ്യ പ്രവർത്തകർക്കിടയിൽ ആശങ്ക വിതയ്‌ക്കുന്നത്.

യുകെയിൽ ആദ്യമായി ജൂലൈ 31-നാണ് ഈ വകഭേദം ശ്രദ്ധയിൽപ്പെടുന്നത്. തുടർന്ന് വിദഗ്ധ സംഘത്തിന്റെ പരിശോധനയിൽ പുതിയ കൊറോണ വൈറസിന്റെ വകഭേദമാണിതെന്ന് സ്ഥിരീകരിക്കുകയായിരുന്നു. രാജ്യത്ത് പനി ബാധിച്ച് ആശുപത്രിയിൽ പ്രവേശിപ്പിക്കുന്ന ഏഴിലൊരാൾക്ക് എറിസ് സ്ഥിരീകരിക്കുന്നുണ്ടെന്നാണ് യുകെ ഹെൽത്ത് സെക്യൂരിറ്റി ഏജൻസി പറയുന്നത്.

തൊണ്ടവേദന, തലവേദന, ക്ഷീണം, ജലദോഷം, തുടങ്ങി സാധാരണ പനി ബാധിച്ചവരിൽ കാണുന്ന പ്രകടമായ ലക്ഷണങ്ങൾ തന്നെയാണ് എറിസ് സ്ഥിരീകരിച്ചവരിൽ കാണുന്ന പ്രധാന ലക്ഷണങ്ങൾ. നേരത്തെ രോഗം ബാധിച്ചവരിലും വാക്‌സിൻ സ്വീകരിച്ചവരിലും സുരക്ഷാ സാദ്ധ്യതകളുണ്ടെങ്കിലും പ്രായമായവരിൽ രോഗം വളരെപ്പെട്ടെന്ന് പടർന്നുപിടിക്കുകയും അപകടാവസ്ഥയിലെത്തിക്കുകയും ചെയ്യുന്നതാണെന്നും യുകെ ആരോഗ്യ സംഘടനകൾ അറിയിച്ചു.