മദ്യപിച്ച് വാഹനം ഓടിച്ച് അപകടങ്ങൾ വിളിച്ചു വരുത്തുന്നത് മനുഷ്യരുടെ സഹജമായ സ്വഭാവമാണ്. ഇനി മദ്യപിച്ച് വാഹനമോടിച്ച് കഷ്ടപ്പെടേണ്ട, സൗജന്യ ടാക്സി സർവീസ് നിങ്ങളെ വീട്ടിൽ എത്തിക്കും. എന്നാൽ കേരളത്തിലെ മദ്യപാനികൾ സന്തോഷിക്കാൻ വരട്ടെ, സംഗതി അങ്ങ് ഇറ്റലിയിലാണ്.
ഇറ്റലിയിൽ മദ്യപിച്ച് വാഹനമോടിച്ച് അപകടങ്ങൾ പതിവായതോടെയാണ് ഗവൺമെന്റ് സൗജന്യ ടാക്സി സർവീസ് എന്ന ആശയത്തിന് തുടക്കം കുറിച്ചത്. പദ്ധതി സെപ്റ്റംബർ അവസാനത്തോടെ ആരംഭിക്കും. പദ്ധതിയുടെ ഭാഗമായി 6 നിശാക്ലബുകളിൽ ടാക്സി സർവീസ് ഉണ്ടാകുന്നതായിരിക്കും. പദ്ധതി പ്രകാരം ക്ലബുകളിൽ നിന്നും മറ്റും പുറത്തിറങ്ങുന്നവർ അമിതമായി മദ്യപിക്കുന്നുണ്ടെങ്കിൽ അവരെ വൈദ്യ പരിശോധനക്ക് വിധേയമാക്കിയ ശേഷം വീട്ടിൽ കൊണ്ടുപോയി വിടുന്നതായിരിക്കും. ഇറ്റലിയിലെ പ്രധാന മന്ത്രിയും ഗതാഗത മന്ത്രിയുമാണ് അപകടങ്ങൾ വർദ്ധിക്കുന്ന സാഹചര്യത്തിൽ ഇത്തരമൊരു പദ്ധതി ആവിഷ്‌കരിക്കാൻ മുന്നിട്ടിറങ്ങിയത്. ഇതിനായുള്ള പണവും ഇറ്റലിയിലെ ഗതാഗത മന്ത്രാലയം അടക്കുന്നതായിരിക്കും.
ഇറ്റലിയിൽ മദ്യപിച്ച് വാഹനമോടിച്ച് അപകടങ്ങൾ വർദ്ധിച്ചു വരുന്ന സാഹചര്യം മുന്നിൽ കണ്ടു കൊണ്ട് ഫ്രീ ടാക്സി സർവീസിന് തുടക്കമാവുകയാണെന്ന് ഗതാഗത മന്ത്രി മാറ്റിയോ സാൽവിനി ട്വിറ്ററിൽ കുറിച്ചു. യൂറോപ്യൻ ട്രാൻസ്‌പോർട്ട് സേഫ്റ്റി കൗൺസിലിന്റെ സർവേകൾ പ്രകാരം ഇറ്റലിയിൽ മദ്യപിച്ച് വാഹനമോടിക്കുന്നത് മറ്റു രാജ്യങ്ങളെ അപേക്ഷിച്ച് കൂടുതൽ ഇളവുകൾ നൽകുന്നതായി കണ്ടെത്തിയിരുന്നു. ഇതിന്റെ അടിസ്ഥാനത്തിലാണ് ഇറ്റലി ഗവൺമെന്റ് മദ്യപിച്ച് വാഹനമോടിക്കുന്നവർക്കായി ‘ഫ്രീ ടാക്സി റൈഡ്’ ആവിഷ്‌കരിക്കാൻ പോകുന്നത്.
Comments