കോട്ടയം: വിവിധ കേസുകളില് പ്രതിയായ കാമുകനെ പിടികൂടിയ പോലീസിന് നേരെ പെണ്കുട്ടിയുടെ ചീത്തവിളിയും കൈയേറ്റ ശ്രമവും.തൃക്കൊടിത്താനം എസ്.എച്ച്.ഒ. ജി.അനൂപ്, സി.പി.ഒ ശെല്വരാജ് എന്നിവരുടെ നേരേയാണ് പെണ്കുട്ടിയുടെ ചീത്തവിളിയും അതിക്രമവും.
ശനിയാഴ്ച വൈകീട്ട് നാലിന് തൃക്കൊടിത്താനം കൈലാത്തുപടിക്കു സമീപമാണ് സംഭവം. ഗോശാലപ്പറമ്പില് വിഷ്ണുവാണ് (19) പോലീസിന്റെ പിടിയിലായത്. ബാറില് അക്രമം നടത്തിയതുള്പ്പെടെയുള്ള കേസ് ഇയാളുടെ പേരിലുണ്ടെന്ന് പോലീസ് പറഞ്ഞു.
വിഷ്ണുവിനെ കോടതിയില് ഹാജരാക്കി റിമാന്ഡുചെയ്തു.
വിഷ്ണുവിനെ ജീപ്പില്നിന്നു ഇറക്കിവിടണമെന്നാവശ്യപ്പെട്ടാണ് പെണ്കുട്ടി അതിക്രമം നടത്തിയതെന്ന് എസ്.എച്ച്.ഒ. പറഞ്ഞു. സംഭവമറിഞ്ഞ് നാട്ടുകാരും സ്ഥലത്തെത്തി. സ്റ്റേഷനില്നിന്നുമെത്തിയ ശെല്വരാജ് ജീപ്പിന്റെ ഒരു വശത്ത് നില്ക്കുമ്പോള് പെണ്കുട്ടി ജീപ്പിന്റെ ഡോറടച്ചു. ഡോറിനിടയില്പ്പെട്ട് ശെല്വരാജിന്റെ കൈപ്പത്തിക്കു പരിക്കേറ്റു. ശെല്വരാജിനെ ആശുപത്രിയില് എത്തിച്ച് പ്രഥമശുശ്രൂഷ നല്കി.
യുവാവിന്റെ വീട്ടില് സംശയാസ്പദമായ സാഹചര്യത്തില് പ്രായപൂര്ത്തിയാകാത്ത പെണ്കുട്ടിയെ കണ്ടതായുള്ള വിവരത്തെ തുടര്ന്നാണ് തൃക്കൊടിത്താനം പോലീസ് സംഭവ സ്ഥലത്തെത്തുന്നത്. അന്വേഷണത്തില് ഇത് ശരിയാണെന്ന് കണ്ടെത്തി.
എസ്.എച്ച്.ഒ. അനൂപും ഡ്രൈവറുമാണ് അന്വേഷണത്തിനെത്തിയത്. പോലീസ് ചോദ്യംചെയ്യുകയും വിഷ്ണുവിനെ അറസ്റ്റുചെയ്ത് ജീപ്പില് കയറ്റുകയും ചെയ്തു. ഈസമയം വിഷ്ണുവിനൊപ്പമുണ്ടായിരുന്ന പ്രായ പൂര്ത്തിയാകാത്ത പെണ്കുട്ടിയാണ് പോലീസിനെതിരെ തിരിഞ്ഞത്.
