ഹൈദരാബാദ്: ഇടിക്കൂട്ടിലെ ആരാധകരുടെ പ്രിയതാരം ജോൺസീന ഡബ്ല്യൂ.ഡബ്ല്യൂ.ഇയിലേക്ക് തിരിച്ചുവരുന്നു. ഡബ്ല്യു.ഡബ്ല്യു.ഇക്കൊപ്പം ചേർന്ന് രണ്ടുപതിറ്റാണ്ട് പൂർത്തിയാകുന്നതിന്റെ ഭാഗമായാണ് താരം തിരിച്ചുവരുന്നത്.16 തവണ ലോക ചാമ്പ്യനായ സീന റിക് ഫ്‌ലെയർക്കൊപ്പം റെക്കോർഡ് പങ്കുവയ്‌ക്കുന്ന താരമാണ്.
താരത്തിന്റെ തിരിച്ചുവരവ് ഇന്ത്യൻ ആരാധകർക്കും സന്തോഷം നൽകുന്നതാണ്. കാരണം ഡബ്ല്യൂ.ഡബ്ല്യൂ.ഇയിലേക്ക് തിരിച്ചെത്തുന്ന താരത്തിന്റെ ഒരു മത്സരം ഇന്ത്യയിലും നടക്കുന്നുണ്ട് എന്ന വിവരമാണ് ആരാധകരെ ആവേശത്തിലാഴ്‌ത്തുന്നത്. സെപ്റ്റംബർ എട്ടിന് ഹൈദരാബാദിൽ നടക്കുന്ന ഡബ്ല്യൂ.ഡബ്ല്യൂ.ഇ സൂപ്പർസ്റ്റാർ സ്പെക്ടക്കിളിൽ അദ്ദേഹം പങ്കെടുക്കും. ആദ്യമായാണ് ജോൺ സീന ഇന്ത്യയിൽ മത്സരിക്കാനായി എത്തുന്നത്. ഹൈദരാബാദിലെ മത്സരം ജി.എം.സി ബാലയോഗി ഇൻഡോർ സ്റ്റേഡിയത്തിൽ നടക്കും. എന്നാൽ എതിരാളി ആരാണെന്നതിനെ കുറിച്ചുള്ള വിവരങ്ങളൊന്നും പുറത്തിവിട്ടിട്ടില്ല.
സെപ്റ്റംബർ ഒന്നിന് പെൻസിൽവാനിയയിലെ ഹെർഷെയിലെ ദി ജയന്റ് സെന്ററിൽ നടക്കാനിരിക്കുന്ന സ്മാക്ഡൗണിന്റെ ആദ്യ എപ്പിസോഡിൽ സീന റിംഗിലെത്തും തുടർന്നാണ് ഇന്ത്യയിലേക്കുള്ള വരവ്. ഇന്ത്യയിലേക്കുള്ള വരവിൽ അതിയായ സന്തോഷമുണ്ടെന്നും എല്ലാവരെയും കാണാൻ കാത്തിരിക്കുന്ന താൻ ആവേശത്തിലാണെന്നും സീന എക്‌സിൽ(ട്വിറ്ററിൽ) കുറിച്ചു.
Comments