വ്യാപാരികൾക്ക് സന്തോഷ വാർത്ത! അക്കൗണ്ടിൽ പണമെത്താൻ ഇനി ടു-ഇൻ വൺ സൗണ്ട് ബോക്‌സ്; കാർഡ് സൗണ്ട്‌ബോക്‌സ് പുറത്തിറക്കി; ഉപഭോക്താക്കൾ ചെയ്യേണ്ടത് ഇത്രമാത്രം..

രാജ്യത്ത് റെക്കോർഡ് ഡിജിറ്റൽ ഇടപാടുകളാണ് നടക്കുന്നത്. വ്യവസായ മേഖലയിലുള്ളവർക്ക് ഏറെ ഉപകാരപ്രദവുമാണ് ഈ ഡിജിറ്റൽ സംവിധാനങ്ങൾ. ഡിജിറ്റൽ പേയ്‌മെന്റ് ആപ്പുകളിൽ പേടിഎമ്മിനോടാണ് വ്യാപാരികൾക്ക് പ്രിയം. പേടിഎമ്മിന്റെ സൗണ്ട് ബോക്‌സാണ് കാരണം. പണം അക്കൗണ്ടിലെത്തിയോ എന്നറിയാൻ ഫോൺ പരിശോധിക്കേണ്ടതില്ല, മറിച്ച് സൗണ്ട് ബോക്‌സിൽ നിന്ന് ശബ്ദ സന്ദേശമെത്തും. സ്‌കാൻ ചെയ്ത് പണം കൈമാറുന്നതോടെ ബോക്‌സിൽ നിന്ന് ശബ്ദമെത്തുന്നതായിരുന്നു സൗണ്ട് ബോക്‌സ്. എന്നാൽ കാർഡ് സൗണ്ട് ബോക്‌സ് അവതരിപ്പിച്ചിരിക്കുകയാണ് പേടിഎം.

പേടിഎമ്മിന്റെ ഉടമസ്ഥതയിലുള്ള One97 കമ്മ്യൂണിക്കേഷൻസ് ലിമിറ്റഡാണ് കാർഡ് സൗണ്ട്‌ബോക്‌സ് പുറത്തിറക്കിയത്. വിസ, മാസ്റ്റർകാർഡ്, അമേരിക്കൻ എക്‌സ്പ്രസ്, റുപേ എന്ന് തുടങ്ങി എല്ലാ കാർഡ് പേയ്‌മെന്റുകളും കാർഡ് സൗണ്ട് ബോക്‌സ് സ്വീകരിക്കും. മൊബൈൽ പേയ്‌മെന്റുകളും കാർഡ് പേയ്‌മെന്റുകളും ഒരേ ബോക്‌സിൽ ഇനി ലഭ്യമാകും. എൽസിഡി ഡിസ്‌പ്ലേ വഴിയും ശബ്ദത്തിലൂടെയും പേയ്‌മെന്റ് വിവരങ്ങൾ ബോക്‌സ് നൽകും. ‘ടാപ്പ് ആന്റ് പേ’ സംവിധാനവും കാർഡ് ബോക്‌സിൽ അവതരിപ്പിച്ചിട്ടുണ്ട്. 5,000 രൂപയുടെ ഇടപാടാണ് ടാപ്പ് ആന്റ് പേ വഴി കൈമാറ്റം ചെയ്യാവുന്നത്. 4 W സ്പീക്കറാണ് ബോക്‌സിൽ ഉൾപ്പെടുത്തിയിട്ടുള്ളത്. അഞ്ച് ദിവസം വരെ ശേഷിയുള്ള ബാറ്ററിയാണ് ഘടിപ്പിച്ചിരിക്കുന്നത്.

രാജ്യത്തെ ചെറുകിട വ്യാപാരങ്ങളെ നവീകരിക്കുന്നതിലും സാമ്പത്തിക ഇടപാടുകൾ ലളിതമാക്കുന്നതിനും പേടിഎം ഏറെ ശ്രദ്ധിക്കുന്നുണ്ടെന്ന് പേടിഎം സഹസ്ഥാപകൻ വിജയ് ശേഖർ ശർമ വ്യക്തമാക്കി. ലളിതമായ പണമിടപാടുകൾ ലഭ്യമാകുന്നതിന്റെ അടുത്ത പടിയാണ് പേടിഎം കാർഡ് സൗണ്ട് ബോക്‌സെന്നും അദ്ദേഹം പറഞ്ഞു. വ്യാപാരികൾക്കും ഉപഭോക്താക്കൾക്കും മൊബൈൽ പേയ്‌മെന്റ് പോലെ തന്നെ ആവശ്യമാണ് കാർഡ് പേയ്‌മെന്റെന്ന് കണ്ടെത്തി. ഈ രണ്ട് ആവശ്യങ്ങളും ലയിപ്പിക്കുന്നതാണ് പുതിയ ബോക്‌സെന്നും അദ്ദേഹം കൂട്ടിച്ചേർത്തു.

പണരഹിത ഇടപാടുകളെ ത്വരിതപ്പെടുത്തുകയും കോൺടാക്‌റ്റ് ലെസ് കാർഡ് പേയമെന്റുകൾ നടത്തുകയും ചെയ്യുന്ന സംവിധാനമാണ് പേടിഎം സൗണ്ട് ബോക്‌സ്. ഈ സംവിധാനം രാജ്യത്ത് ആദ്യമായാണ് അവതരിപ്പിക്കുന്നതെന്ന് നാഷണൽ പേയ്‌മെന്റ് കോർപ്പറേഷൻ അറിയിച്ചു.