കൺനിറയെ കണ്ട കണ്ണന്മാർ; ശ്രീകൃഷ്ണ വേഷത്തിൽ തിളങ്ങിയ താരങ്ങൾ

ഭഗവാൻ ശ്രീകൃഷണന്റെ ജന്മദിനം ഇന്ത്യയിൽ വലിയ ആഘോഷമാണ്. രാജ്യത്തുടനീളം ആവേശത്തോടെ ആഘോഷിക്കപ്പെടുന്ന ഒന്നാണ് ജന്മാഷ്ഠമി. ഈ ദിവസം ടെലിവിഷനുകളിൽ ശ്രീകൃഷ്ണ കഥകളും സിനിമകളും സംപ്രേക്ഷണം ചെയ്യാറുണ്ട്. ശ്രീകൃഷണ ഭഗവാന്റെ കഥകൾ പറഞ്ഞ പരമ്പരകൾക്ക് വലിയ ജനപ്രീതിയാണ് ഭക്തർക്കിടയിലും പ്രേക്ഷകർക്കിടയിലുമുള്ളത്. ശ്രീകൃഷ്ണ വേഷം അനശ്വരമാക്കിയ നിരവധി ടെലിവിഷൻ താരങ്ങളുണ്ട്. ടെലിവിഷൻ ഷോകളിലും സീരിയലുകളിലും ശ്രീകൃഷ്ണനെ അവതരിപ്പിക്കാൻ ഭാഗ്യം ലഭിച്ച് പ്രശസ്തരായ ചില അഭിനേതാക്കളെ പരിചയപ്പെടാം.

സുമേദ് മുദ്ഗൽക്കർ

‘രാധാകൃഷ്ണൻ’ എന്ന ജനപ്രിയ പരമ്പരയിൽ ശ്രീകൃഷ്ണനായി പ്രത്യക്ഷപ്പെട്ട യുവാവ്. ഒരുപക്ഷേ ഏറ്റവും കൂടുതൽ ആരാധകരുള്ള ടെലിവിഷൻ സീരിയൽ താരമായിരിക്കും സുമേദ് മുദ്ഗൽക്കർ. കൃഷ്ണവേഷം അദ്ദേഹത്തിന്റെ അഭിനയ മികവിനെ ശ്രദ്ധേയമാക്കി എന്നതിനുപുറമെ ഇന്ത്യയൊട്ടുക്കെ ആരാധകരെയും സൃഷ്ടിച്ചു. കൃഷ്ണനായി അഭിനയിച്ചതിന് വലിയ അംഗീകാരങ്ങൾ കലാരംഗത്ത് നിന്നും സുമേദിന് ലഭിച്ചിട്ടുണ്ട്.

സൗരഭ് രാജ് ജെയിൻ

‘മഹാഭാരതം’എന്ന പുരാണ പരമ്പരയിൽ കൃഷ്ണനായി എത്തി ആരാധകരെ അത്ഭുതപ്പെടുത്തിയ താരം. ചടുലമായ വാക്കുകളും മുഖഭാവങ്ങളുമാണ് സൗരഭ് രാജിനെ മറ്റ് താരങ്ങളിൽ നിന്ന് വ്യത്യസ്തമാക്കിയത്. മഹാഭാരതത്തിന് പ്രേക്ഷക പിന്തുണ ലഭിച്ചതും കൃഷണനായെത്തിയ സൗരഭ് രാജിന്റെ പ്രകടനങ്ങൾ കൊണ്ടുതന്നെ. മഹാഭാരത്തിന് ശേഷം ‘മഹാകാളി – അന്ത് ഹി ആരംഭ് ഹേ’ എന്നീ പരമ്പരയിലും അദ്ദേഹം കൃഷണവേഷം ചെയ്തു. സൗരഭ് രാജിന്റെ കൃഷ്ണവേഷം വളരെയധികം പ്രശംസിക്കപ്പെട്ടു.

സർവദമൻ ഡി ബാനർജി

ശ്രീ കൃഷ്ണ’ എന്ന ടെലിവിഷൻ പരമ്പരയിലെ ശ്രീകൃഷ്ണന്റെ വേഷത്തിലൂടെ പ്രശസ്തനായ താരമാണ് സർവദമൻ ഡി ബാനർജി. കൃഷ്ണനായുള്ള അദ്ദേഹത്തിന്റെ പ്രകടനം പ്രേക്ഷകർക്കിടയിൽ വലിയ തോതിൽ ശ്രദ്ധ ആകർഷിച്ചു. ഏതാനും വർഷങ്ങൾക്ക് മുമ്പാണ് കൃഷ്ണവേഷം ചെയ്തതെങ്കിലും ഇപ്പോഴും ഇദ്ദേഹത്തെ കൃഷ്ണൻ എന്ന് വിളിക്കാനാണ് ആരാധകർ ഇഷ്ടപ്പെടുന്നത്.

നിതീഷ് ഭരദ്വാജ്

വർഷങ്ങൾക്ക് മുമ്പ് ശ്രീകൃഷ്ണനായി പ്രേക്ഷക മനസിൽ ഇടം നേടിയ താരം. മഹാഭാരതം എന്ന ഇതിഹാസ ടെലിവിഷൻ പരമ്പരയിലെ ശ്രീകൃഷ്ണന്റെ കഥാപാത്രത്തിലൂടെയാണ് ഇന്നും നിതീഷ് ഭരദ്വാജ് അറിയപ്പെടുന്നത്. ദൂരദർശൻ പരമ്പരയിൽ കൃഷ്ണ വേഷം ചെയതതിന് ശേഷം നിരവധി അവസരങ്ങൾ അദ്ദേഹത്തെ തേടിയെത്തുകയും മികവുറ്റ അഭിനയ ജീവിതത്തിന് വഴിയൊരുക്കുകയും ചെയ്തു. നിതീഷിന്റെ പ്രകടനം പ്രേക്ഷകരിൽ മതിപ്പ് സൃഷ്ടിച്ചു. പ്രേക്ഷരുടെ മനസിൽ കൃഷ്ണനായി നിതീഷ് ഭരദ്വാരജാണ് ഇന്നുമുള്ളത്.

വിശാൽ കർവാൾ

‘ദ്വാരകാധീഷ്-ഭഗവാൻ ശ്രീകൃഷ്ണ’ എന്ന് പരമ്പരയിലൂടെയാണ് വിശാൽ കർവാൾ ടെലിവിഷൻ രംഗത്തെത്തിയത്. ഇതിലൂടെ അദ്ദേഹത്തിന് നിരവധി അംഗീകാരങ്ങളും അവസരങ്ങളും ലഭിച്ചു. കൃഷണവേഷത്തിന് ശേഷം നിരവധി സീരിയലുകളിൽ വിശാൽ അഭിനയിച്ചെങ്കിലും കൃഷ്ണനെന്നാണ് പ്രേക്ഷകർ താരത്തെ വിശേഷിപ്പിക്കുന്നത്.