“ജയ് ശ്രീ റാം” ചൊല്ലി അഭിവാദ്യം ; ഋഷി സുനക്കിനെ ഇന്ത്യയിലേയ്‌ക്ക് സ്വീകരിച്ചത് ഭഗവദ് ഗീതയും, ഹനുമാൻ ചാലിസയും , രുദ്രാക്ഷവും നൽകി

ന്യൂഡൽഹി ; ജി 20 ഉച്ചകോടിയിൽ പങ്കെടുക്കാൻ എത്തിയ ബ്രിട്ടീഷ് പ്രധാനമന്ത്രി ഋഷി സുനക്കിനെയും ഭാര്യ അക്ഷത മൂർത്തിയെയും “ജയ് ശ്രീ റാം” ചൊല്ലി അഭിവാദ്യം ചെയ്ത് കേന്ദ്രമന്ത്രി അശ്വിനി കുമാർ ചൗബെ . ഇന്ന് പാലം വിമാനത്താവളത്തിൽ എത്തിയ ഋഷി സുനക്കിനും അക്ഷത മൂർത്തിക്കും ഭഗവദ് ഗീതയുടെയും ഹനുമാൻ ചാലിസയുടെയും പകർപ്പും, രുദ്രാക്ഷവും അശ്വനി കുമാർ സമ്മാനിച്ചു. നേരത്തെ, തന്റെ ഇന്ത്യാ സന്ദർശനം “വ്യക്തമായും സവിശേഷത നിറഞ്ഞതാണെന്ന് “ ഋഷി സുനക് പറഞ്ഞിരുന്നു.

“ ഞാൻ വ്യക്തമായ താല്പര്യത്തോടെയാണ് ജി 20 ഉച്ചകോടിയിലേക്ക് പോകുന്നത്. ആഗോള സമ്പദ്‌വ്യവസ്ഥയെ സ്ഥിരപ്പെടുത്തുന്നു. അന്താരാഷ്‌ട്ര ബന്ധങ്ങൾ കെട്ടിപ്പടുക്കുന്നു. ഏറ്റവും ദുർബലരായവരെ പിന്തുണയ്‌ക്കുന്നു,” – ഇന്ത്യയിലേയ്‌ക്കുള്ള യാത്രയ്‌ക്ക് മുൻപ് സുനക് ട്വീറ്റ് ചെയ്തു.

മൂന്ന് ദിവസത്തെ ഇന്ത്യാ സന്ദർശനത്തിൽ പ്രധാനമന്ത്രി നരേന്ദ്ര മോദിയുമായി ഋഷി സുനക് ഉഭയകക്ഷി ചർച്ചയും നടത്തും. 18-ാമത് ജി 20 ഉച്ചകോടി നാളെ മുതൽ 10 വരെ ന്യൂഡൽഹിയിലെ പ്രഗതി മൈതാനിയിൽ പുതുതായി നിർമ്മിച്ച അന്താരാഷ്‌ട്ര കൺവെൻഷനും പ്രദർശന കേന്ദ്രവുമായ ഭാരത് മണ്ഡപത്തിലാണ് നടക്കുക .

യൂറോപ്യൻ യൂണിയനിലെയും ക്ഷണിക്കപ്പെട്ട അതിഥി രാജ്യങ്ങളിലെയും 30-ലധികം രാഷ്‌ട്രത്തലവന്മാരും ഉന്നത ഉദ്യോഗസ്ഥരും 14 അന്താരാഷ്‌ട്ര സംഘടനാ മേധാവികളും ഉച്ചകോടിയിൽ പങ്കെടുക്കും.