അല്ലു അർജുന്റെ ‘പുഷ്പ -2’; റിലീസ് തീയതി പ്രഖ്യാപിച്ചു

അല്ലു അർജുന് ദേശീയ അവാർഡ് നേടി കൊടുത്ത ചിത്രമാണ് പുഷ്പ. അല്ലു അർജുനും രശ്മിക മന്ദാനയും തകർത്തഭിനയിച്ച ചിത്രത്തിന് നിരവധി ആരാധകരാണുള്ളത്. സിനിമയുടെ ആദ്യ ഭാഗത്തിന് ശേഷം ആരാധകർ ആകാംക്ഷയോടെ കാത്തിരുന്നത് ചിത്രത്തിന്റെ രണ്ടാം ഭാഗത്തിന് വേണ്ടിയായിരുന്നു. ഇപ്പോഴിതാ ‘പുഷ്പ -2’ ന്റെ റിലീസ് തീയതി പ്രഖ്യാപിച്ചിരിക്കുകയാണ് ചിത്രത്തിന്റെ അണിയറപ്രവർത്തകർ.

2024 ഓഗസ്റ്റ് 15-ന് ചിത്രം തിയേറ്ററിലെത്തുമെന്നാണ് അണിയറ പ്രവർത്തകർ ഔദ്യോഗികമായി അറിയിച്ചിരിക്കുന്നത്. ആരാധകരുടെ ഏറെ നാളത്തെ കാത്തിരിപ്പിന് വിരാമമിട്ടാണ് ചിത്രത്തിന്റെ റിലീസ് തീയതി പുറത്തുവന്നത്. ‘പുഷ്പ-ദ റൈസ്’ എന്ന ചിത്രത്തിന്റെ രണ്ടാം ഭാഗത്തിനായി ആകാംക്ഷയോടെ കാത്തിരിക്കുകയാണ് രാജ്യത്തുടനീളമുള്ള ആരാധകർ.

ഇന്ത്യൻ പ്രേക്ഷകരെ ആവേശത്തിലാക്കിയ ചിത്രമാണ് പുഷ്പ. ചിത്രത്തിൽ വില്ലനായാണ് ഫഹദ് ഫാസിലിന്റെ വരവ്. ശരീരഭാഷയിലും പെരുമാറ്റത്തിലും ഇതുവരെ കാണാതിരുന്ന പുത്തൻ ആവിഷ്‌കാരവുമായാണ് അല്ലു അർജുൻ പുഷ്പയിലെത്തിയത്.