എനിക്ക് സിനിമ സൗഹൃദങ്ങളാണ്; ഇതൊരു കലയല്ലേ കൊല്ലാൻ പാടുണ്ടോ എന്നൊക്കെ പലരും ചോദിക്കാറുണ്ട്; എനിക്കിത് കലയും കൊലയൊന്നുമല്ല, ജോലിയാണ്: ധ്യാൻ ശ്രീനിവാസൻ

നിരവധി സിനിമകൾ ചെയ്ത് ശ്രദ്ധേയനായ നടനാണ് ധ്യാൻ ശ്രീനിവാസൻ. സഹോദരൻ വിനീത് ശ്രീനിവാസൻ സംവിധാനം ചെയ്ത തിര എന്ന ചിത്രത്തിലൂടെയാണ് താരത്തിന്റെ കടന്നുവരവ്. സിനിമകൾ ചെയ്യുന്നതിന് പുറമേ ധ്യാനിന്റെ അഭിമുഖങ്ങളാണ് എപ്പോഴും പ്രേക്ഷക ശ്രദ്ധ നേടുന്നത്. ഇപ്പോഴിതാ ഒരു സ്വകാര്യ ചാനലിന് നൽകിയ അഭിമുഖത്തിൽ ധ്യാൻ പങ്കുവെച്ച കാര്യങ്ങളാണ് ശ്രദ്ധേയമാകുന്നത്.

‘എനിക്ക് വരുന്ന സിനിമകൾ കൃത്യമായി ഞാൻ തീർക്കുന്നു. സിനിമയെ ഞാനൊരു ജോലി ആയിട്ട് മാത്രമേ കണക്കാക്കുന്നുള്ളു. ഇതൊരു കലയല്ലേ അതിനെ കൊല്ലാൻ പാടുണ്ടോ എന്നൊക്കെ പലരും പറയാറുണ്ട്. എന്നാൽ എനിക്കിത് കലയും കൊലയൊന്നുമല്ല ഇതെന്റെ ജോലി മാത്രമാണ്. സിനിമകൾ പരാജയപ്പെടാൻ അനേകം കാരണങ്ങളുണ്ട്. പല സിനിമകളും പരാജയപ്പെട്ടിട്ടും എന്തുകൊണ്ട് എനിക്ക് ഇത്രയും സിനിമകൾ ചെയ്യാൻ അവസരം വരുന്നുവെന്നത് ചിന്തിക്കണം’.

‘ഞാൻ ആരുടെ അടുത്തും പോയിട്ട് എനിക്ക് സിനിമ താ എന്ന് പറയുന്നില്ല. ഒരു ഡയറക്ടർ അല്ലെങ്കിൽ പ്രൊഡ്യൂസർ കഥ കേട്ട് അവർ തീരുമാനിച്ച് ഉറപ്പിച്ച നടന്റെ അടുത്താണ് കഥ പറയുന്നത്. ഇത്രയും പരാജയം വന്ന ഒരു നടനോട് എന്തിനാണ് ഡയറക്ടറും പ്രൊഡ്യൂസറും കഥ പറയുന്നത്. വരുന്ന സ്‌ക്രിപ്റ്റുകൾ കേൾക്കുമ്പോൾ തന്നെ മോശമാണെന്ന് തോന്നിയിട്ടുണ്ട്. പക്ഷേ ഇതെന്റെ ജോലിയാണ്. അതിനാലാണ് ഞാൻ ചെയ്യുന്നത്. ഇത്രയും പരാജയമായിട്ടും സിനിമകളുടെ എണ്ണം കൂടിയിട്ടെ ഉള്ളു’.

‘എനിക്ക് സിനിമ സൗഹൃദങ്ങളാണ്. സൗഹൃദത്തിന്റെ പേരിലാണ് പല സിനിമകളും ഞാൻ ചെയ്യുന്നത്. പരാജയപ്പെടും എന്ന് അറിഞ്ഞിട്ടും അവർക്ക് വേണ്ടി അത്തരം സിനിമകൾ ചെയ്യാറുണ്ട്. അഭിനയത്തോട് കൃത്യമായൊരു കരിയർ പ്ലാനിംഗ് ഒന്നും എനിക്കില്ല. എന്നിട്ടും വളരെയധികം സിനിമകളാണ് എന്റെ അടുത്തേക്ക് വരുന്നത്’ ധ്യാൻ ശ്രീനിവാസൻ പറഞ്ഞു.