ശ്രീനഗർ: ഭീകരവാദത്തിന് പരിഹാരം കാണാൻ ഭാരതം പാകിസ്താനുമായി ചർച്ച നടത്തണമെന്ന് ജമ്മു കശ്മീർ മുൻ മുഖ്യമന്ത്രിയും നാഷണൽ കോൺഫറൻസ് മേധാവിയുമായ ഫറൂഖ് അബ്ദുള്ള. രജൗരിയിലെ അനന്ത്നാഗിൽ തീവ്രവാദികൾക്കെതിരെ സേന പോരാട്ടം ശക്തമാക്കുന്നതിനിടയിലാണ് ഫറൂഖ് അബ്ദുള്ളയുടെ ചർച്ചയ്ക്കുള്ള ആഹ്വാനം.
‘പാകിസ്താനുമായി ചർച്ച ചെയ്ത് സമാധാനം കൈവരിക്കാൻ ഇന്ത്യ ശ്രമിക്കണം. ഭീകരവാദം അവസാനിപ്പിക്കാൻ ചർച്ചയാണ് നല്ലത്. പോരാട്ടത്തിലൂടെ സമാധാനം കൈവരിക്കാനാവില്ല. അനന്ത്നാഗിൽ ഭീകരരുമായുണ്ടായ ഏറ്റുമുട്ടലിൽ വിരമൃത്യു വരിച്ച ജമ്മു കശ്മീർ പോലീസ് ഡെപ്യൂട്ടി സൂപ്രണ്ട് ഹുമയൂൺ ഭട്ടിന്റെ കുടുംബത്തെ സന്ദർശിച്ച ശേഷം മാധ്യമപ്രവർത്തകരോട് സംസാരിക്കുകയായിരുന്നു മുൻ കേന്ദ്രമന്ത്രി.
ഇനിയും ഇത്തരം സംഭവങ്ങൾ ആവർത്തിക്കും, ഇത് അവസാനിക്കുമെന്ന് വിചാരിച്ചാൽ നിങ്ങൾ മണ്ടന്മാരാണ്. ചർച്ചയല്ലാതെ വഴിയില്ല. ഈ ഭീകരർ എവിടെ നിന്നാണ് വരുന്നതെന്ന അറിയാൻ തനിക്ക് ദിവ്യദൃഷ്ടിയില്ല. അതിർത്തി കടന്നുള്ള ഭീകരവാദത്തെ പിന്തുണയ്ക്കുന്ന തരത്തിലായിരുന്നു അബ്ദുള്ളയുടെ പരാമർശം. ഭീകരപ്രവർത്തനത്തിൽ അഫ്ഗാനികളുടെ പങ്കിനെ കുറിച്ചുള്ള ചോദ്യത്തിന്, ആരുടെയും നേരെ വിരൽ ചൂണ്ടാൻ ആഗ്രഹിക്കുന്നില്ലെന്ന് അബ്ദുള്ള പറഞ്ഞു.
കഴിഞ്ഞ ദിവസം അനന്ത്നാഗിൽ ഭീകരരുമായുള്ള ഏറ്റുമുട്ടലിൽ 19 രാഷ്ട്രീയ റൈഫിൾസ് യൂണിറ്റിലെ കമാൻഡിംഗ് ഓഫീസർ കേണൽ മൻപ്രീത് സിംഗ്, മേജർ ആശിഷ് ധോഞ്ചക്, ജമ്മു കശ്മീർ പോലീസ് ഡെപ്യൂട്ടി സൂപ്രണ്ട് ഹുമയൂൺ ഭട്ട് എന്നിവരാണ് വീരമൃത്യു വരിച്ചത്. ഇതിന്റെ പിന്നിൽ ലഷ്കർ-ഇ-തൊയ്ബയുടെ കശ്മീരി പതിപ്പായ ദ റെസിസ്റ്റൻസ് ഫ്രണ്ട് ആണെന്ന് സ്ഥിരീകരിച്ചിട്ടുണ്ട്. ഇതിന്റെ അടിസ്ഥാനത്തിലാണ് ജമ്മു-കശ്മീരിൽ സുരക്ഷ ശക്തമാക്കിയിരിക്കുകയാണ്.
