വാരാണസി : കാശി വിശ്വനാഥ ക്ഷേത്രത്തിൽ ദർശനം നടത്തി ക്രിക്കറ്റ് താരം സച്ചിൻ ടെൻഡുൽക്കർ .അന്താരാഷ്‌ട്ര ക്രിക്കറ്റ് സ്റ്റേഡിയത്തിന്റെ ശിലാസ്ഥാപന ചടങ്ങിൽ പങ്കെടുക്കാനാണ് അദ്ദേഹം ഉത്തർപ്രദേശിലെത്തിയത്. ചുവന്ന കുർത്തയും പൈജാമയും ധരിച്ചെത്തിയ സച്ചിനെ ക്ഷേത്ര അധികൃതർ നേരിട്ടെത്തി സ്വീകരിച്ചു.
താരം കാശിവിശ്വനാഥന് പ്രത്യേക ധാരകളും പൂജകളും നടത്തി . സച്ചിനെ കൂടാതെ ഇന്ത്യൻ ക്രിക്കറ്റ് കൺട്രോൾ ബോർഡ് സെക്രട്ടറി ജയ് ഷായും കാശി വിശ്വനാഥ ക്ഷേത്രത്തിലെത്തി. സച്ചിൻ കാശി ക്ഷേത്രത്തിലെത്തിയ ചിത്രങ്ങളും സോഷ്യൽ മീഡിയയിൽ ശ്രദ്ധ നേടിക്കഴിഞ്ഞു.
അത്യാധുനിക സംവിധാനങ്ങളോടുകൂടിയ ക്രിക്കറ്റ് സ്റ്റേഡിയത്തിനാണ് ഇന്ന് ശിലാസ്ഥാപനം നടന്നത് . ഗഞ്ജരിയിലെ പുതിയ സ്റ്റേഡിയം ഭാരതീയ സംസ്‌കൃതി വിളിച്ചോതുന്ന കാശിയെയും പരമശിവനെയും അനുസ്മരിപ്പിക്കുന്ന നിലയിലാണ് പണികഴിപ്പിക്കുന്നത്. ശിവന്റെ പ്രതീകങ്ങളായ ത്രിശൂലം, ചന്ദ്രക്കല, ഢമരു എന്നിവയുടെ മാതൃകകൾ ഉള്‍ക്കൊള്ളിച്ചുകൊണ്ടാണ് നിര്‍മ്മാണം.
