നാല് വർഷത്തെ ഇടവേളയ്‌ക്ക് ശേഷം മമ്മൂട്ടി തെലുങ്കിൽ കേന്ദ്രകഥാപാത്രമായി അഭിനയിച്ച ചിത്രമായിരുന്നു ഏജന്റ്. അഖിൽ അക്കിനേനിയായിരുന്നു ചിത്രത്തിലെ നായകൻ. അഖിൽ അക്കിനേനിയുടെ കരിയറിൽ ഏറ്റവും പ്രതീക്ഷ നൽകിയ ചിത്രം കൂടിയായിരുന്നു ഏജന്റ്. ഈ വർഷം ഏപ്രിൽ 28 ന് ആയിരുന്നു ചിത്രം പ്രദർശനത്തിന് എത്തിയത്. ആക്ഷൻ സ്‌പൈ വിഭാഗത്തിൽപെട്ട ചിത്രം വലിയ ഹൈപ്പോടെയാണ് എത്തിയതെങ്കിലും ബോക്‌സോഫീസിൽ വൻ പരാജയമായിരുന്നു.
തിയറ്റർ വിട്ട് മാസങ്ങളായെങ്കിലും ചിത്രം ഒടിടിയിൽ എത്തിയിരുന്നില്ല. ഒടിടി റിലീസ് വൈകുന്നതിന്റെ കാരണത്തെ പറ്റി അഖിൽ അക്കിനേനി തന്നെ ആരാധകരോട് പലപ്പോഴും തുറന്ന് പറഞ്ഞിരുന്നു. ഇപ്പോഴിതാ അഞ്ച് മാസത്തിനൊടുവിൽ ചിത്രം ഒടിടി റിലീസിന് തയ്യാറെടുക്കുകയാണ്. പ്രമുഖ ഒടിടി പ്ലാറ്റ്‌ഫോം ആയ സോണി ലൈവിലൂടെയാണ് ചിത്രം പ്രേക്ഷകരിലേക്ക് എത്തുക. സെപ്റ്റംബർ 29 ന് ചിത്രം സ്ട്രീമിംഗ് ആരംഭിക്കും.
ചിത്രത്തിന്റെ നിർമ്മാതാവ് അനിൽ സുങ്കരയും സോണി ലൈവും തമ്മിലുള്ള സാമ്പത്തിക വിഷയമാണ് ഒടിടി റിലീസ് നീളാൻ കാരണമെന്ന് നേരത്തെ പ്രചരണം നടന്നിരുന്നു. ഇതിന് പിന്നാലെ വിശദീകരണവുമായി നിർമ്മാതാവും രംഗത്തെത്തിയിരുന്നു. ഒടിടി സ്ട്രീമിംഗിനുവേണ്ടി ചിത്രം പൂർണ്ണമായും തയ്യാറാണെന്നും അന്ന് നിർമ്മാതാവ് പറഞ്ഞിരുന്നു.
