പ്രൈംവീഡിയോ സ്ട്രീമിംഗ് സേവനങ്ങളിൽ അടുത്ത വർഷം മുതൽ പരസ്യങ്ങൾ പ്രദർശിപ്പിക്കുമെന്നറിയിച്ച് ആമസോൺ. ടിവി ഷോകളും സിനിമകളും നിർമിക്കുന്നതിന് വേണ്ടി കൂടുതൽ പണം കണ്ടെത്തുന്നതിനാണിത്. യുകെ, യുഎസ്, കാനഡ എന്നിങ്ങനെയുള്ള രാജ്യങ്ങളിൽ ഉൾപ്പെടെ ഉപഭോക്താക്കൾക്ക് അടുത്ത വർഷം മുതൽ പ്രൈം വീഡിയോയിൽ പരസ്യങ്ങളും കാണാം. എന്നാൽ അധിക തുക നൽകുകയാണെങ്കിൽ പരസ്യത്തിൽ നിന്നും ഒഴിവാകാൻ സാധിക്കും.
ഡിസ്‌നി പ്ലസ് ഹോട്ട്‌സ്റ്റാർ, നെറ്റ്ഫ്‌ളിക്‌സ് എന്നിങ്ങനെയുള്ള എതിരാളികൾക്ക് സമമാണ് പ്രൈംവീഡിയോയുടെ പുതിയ നീക്കം. 2024 അവസാനത്തോടെ ഫ്രാൻസ്, ഇറ്റലി, സ്‌പെയ്ൻ, മെക്‌സിക്കോ എന്നിവിടങ്ങളിലും പരസ്യങ്ങൾ പ്രാബല്യത്തിൽ എത്തും. യുഎസിൽ 2.99 ഡോളർ പ്രതിമാസ നിരക്ക് നൽകുകയാണെങ്കിൽ ഉപഭോക്താക്കൾക്ക് പരസ്യങ്ങളിൽ നിന്നും ഒഴിവാകാൻ സാധിക്കും. ഇതുവരെയും മറ്റ് രാജ്യങ്ങളിലെ നിരക്കുകൾ വ്യക്തമാക്കിയിട്ടില്ല.
