ലോകകപ്പിനുള്ള ഇന്ത്യന്‍ ടീമില്‍ കാതലായ മാറ്റമുണ്ടാകുമെന്ന സൂചനയുമായി നായകന്‍ രോഹിത് ശര്‍മ്മ. രാജ്‌കോട്ടിലെ മൂന്നാം ഏകദിനത്തിന് മുന്‍പ് നടത്തിയ വാര്‍ത്താ സമ്മേളനത്തിലായിരുന്നു രോഹിത്തിന്റെ പരാമര്‍ശം. അശ്വിന്റെ അനുഭവ സമ്പത്തും ക്ലാസും അവഗണിക്കാനാവില്ലെന്നും ലോകകപ്പില്‍ ടീമിന് അത് മുതല്‍കൂട്ടാകുമെന്നാണ് ക്യാപ്റ്റന്‍ വ്യക്തമാക്കിയത്.
‘ കഴിഞ്ഞ വര്‍ഷം ഏകദിനം കളിച്ചില്ലെങ്കിലും അശ്വിന്റെ അനുഭവ സമ്പത്തും ക്ലാസും ഞങ്ങള്‍ക്ക് അവഗണിക്കാനാവില്ല. സമ്മര്‍ദ്ദം നന്നായി കൈകാര്യം ചെയ്യുന്ന താരമാണ് അദ്ദേഹം. കഴിഞ്ഞ മത്സരങ്ങളില്‍ അവന്‍ നന്നായി പന്തെറിഞ്ഞു. പുതിയ ചില പരീക്ഷണങ്ങളും കൊണ്ടുവന്നു. ഒരു അവസരമുണ്ടെങ്കില്‍, ബാക്കപ്പുകള്‍ തയ്യാറായി ഇരിക്കുന്നത് ഞങ്ങള്‍ക്ക് ഗുണകരമാണ്’ രോഹിത് പറഞ്ഞു.
നല്ല ക്രിക്കറ്റ് കളിക്കാനും എതിരാളികളില്‍ സമ്മര്‍ദ്ദം ചെലുത്താനുമാണ് ഞങ്ങള്‍ ശ്രമിക്കുക. ഐസിസി റാങ്കിംഗില്‍ ഒന്നാം റാങ്കുകാരായി ലോകകപ്പിന് പോകുന്നത് പോസിറ്റീവായ കാര്യമാണെങ്കിലും അത് ഗൗരവമായി പരിഗണിക്കേണ്ട. റാങ്കിനും പോയിന്റിനും വേണ്ടിയല്ല കളിക്കുന്നത്-രോഹിത്ത് വ്യക്തമാക്കി.
