കൊച്ചി: ആനപ്രേമികളെ രൂക്ഷമായി വിമർശിച്ച് വനം വകുപ്പ് മന്ത്രി എകെ ശശീന്ദ്രൻ. കണ്ണൂർ ആറളത്തെ ആനമതിൽ നിർമ്മാണ പ്രവൃത്തിയിൽ സംസാരിക്കവെ ആയിരുന്നു മന്ത്രി ആനപ്രേമികളെ രൂക്ഷമായി വിമർശിച്ചത്. അരിക്കൊമ്പൻ മര്യാദക്കാരനായിരുന്നെന്നും ആനപ്രേമികൾ കോടതിയിൽ പോയില്ലായിരുന്നു എങ്കിൽ ആന ഇപ്പോഴും ചിന്നക്കനാലിൽ ഉണ്ടാകുമായിരുന്നു എന്നും മന്ത്രി പറഞ്ഞു. ആനപ്രേമികൾ കപട പരിസ്ഥിതി വാദികളാണെന്നും എകെ ശശീന്ദ്രൻ കുറ്റപ്പെടുത്തി.
കൂടാതെ മരം മുറിക്കുന്നതിന് ഒരു പൊതുമാനദണ്ഡം ആവശ്യമാണ്. ഇക്കാര്യം മുഖ്യമന്ത്രിയുമായി സംസാരിച്ചിട്ടുണ്ട്. വികസന പദ്ധതികളുടെ ഭാഗമായി മരം മുറിക്കാൻ കഴിയാത്തത് പ്രശ്‌നമാണെന്നും വനം മന്ത്രി പറഞ്ഞു.
അതേസമയം അരിക്കൊമ്പൻ ജനവാസ മേഖലയിൽ ഇറങ്ങിയ സംഭവത്തിൽ ആശങ്ക വേണ്ടെന്ന് തമിഴ്‌നാട് വനംവകുപ്പ് അറിയിച്ചിരുന്നു. കൂടാതെ അരിക്കൊമ്പൻ കേരളത്തിലേയ്‌ക്ക് എത്താനുളള സാഹചര്യമില്ലെന്നും കളയ്‌ക്കാട് മുണ്ടൻതുറൈ കടുവ സങ്കേതം വൈൽഡ് ലൈഫ് വാർഡൻ സെമ്പകപ്രിയ പറഞ്ഞു. അരിക്കൊമ്പൻ മദപ്പാടിലാണെന്നും അതിന്റെതായ പ്രശ്‌നങ്ങൾ ഉണ്ടെന്നും ഓരോ അര മണിക്കൂറിലും റേഡിയോ കോളർ സന്ദേശം പരിശോധിക്കുന്നുണ്ടെന്നും സെമ്പകപ്രിയ പറഞ്ഞു.
