ഭീമൻ രഘു ആദ്യമായി സംവിധാനം ചെയ്ത ചിത്രമാണ് ‘ചാണ’. ചിത്രത്തിൽ നായക കഥാപാത്രത്തെ അവതരിപ്പിച്ചതും അദ്ദേഹം തന്നെയാണ്. ഉപജീവനത്തിനായി തെങ്കാശിയിൽ നിന്ന് തന്റെ തൊഴിൽ ഉപകരണമായ ചാണയുമായി കേരളത്തിലേക്ക് വരുന്ന ഒരു തമിഴ് യുവാവിന്റെ ജീവിതത്തിലുണ്ടാകുന്ന ആകസ്മിക സംഭവങ്ങളാണ് ചാണയുടെ ഇതിവൃത്തം. എന്നാൽ, സിനിമ കാണാൻ തിയറ്ററുകളിൽ പ്രേക്ഷകർ വരാതിരുന്നതോടെ അധികനാൾ ചിത്രം ഓടിയില്ല. ഇപ്പോഴിതാ, തന്റെ ഈ ചിത്രത്തിന്റെ തമിഴ് റിമേക്ക് വരുമെന്ന് അവകാശപ്പെട്ടിരിക്കുകയാണ് ഭീമൻ രഘു.
‘ഞാൻ സംവിധാനം ചെയ്ത ചാണ എന്ന സിനിമ തരക്കേടില്ലാതെ ഓടിയിരുന്നു. അത് തമിഴിൽ എടുക്കാനായിട്ട് ഒരു നിർമ്മാതാവ് വന്നു. തമിഴിലേക്കുള്ള അതിന്റെ തിരക്കഥാ രചന ചെന്നൈയിൽ നടന്നുകൊണ്ടിരിക്കുകയാണ്. മലയാളം പതിപ്പ് ഒരു പ്രത്യേക സ്റ്റൈലിലുള്ള പടമായിരുന്നു’.
‘കത്തി രാകി നടക്കുന്ന ഒരു പാവപ്പെട്ടവന്റെ കഥയായിരുന്നു അത്. അതിൽ നിന്ന് വ്യത്യസ്തമായി ആക്ഷനും നല്ല പാട്ടുകളുമെല്ലാം ചേർത്താണ് തമിഴിൽ ചെയ്യാൻ പോകുന്നത്. അർജുനെ പോലുള്ളവരെയാണ് ശ്രമിക്കുന്നത്. വിജയിയെ ഒക്കെ ട്രൈ ചെയ്യുന്നുണ്ടെന്ന് തോന്നുന്നു’ എന്നാണ് ഒരു ഓൺലൈൻ ചാനലിന് നൽകിയ അഭിമുഖത്തിൽ ഭീമൻ രഘു പറഞ്ഞത്.