കങ്കണ റണാവത്ത് കേന്ദ്ര കഥാപാത്രമായി എത്തുന്ന തേജസ് ഒക്ടോബർ 27-ന് പ്രദർശനത്തിനെത്തും. ചിത്രത്തിൽ എയർഫോഴ്‌സ് പൈലറ്റ് തേജസ് ഗില്ലിന്റ് എന്ന കഥാപാത്രത്തെയാണ് താരം അവതരിപ്പിക്കുന്നത്. ഒക്ടോബർ രണ്ട് ഗാന്ധിജയന്തി ദിനത്തോടനുബന്ധിച്ച് ചിത്രത്തിന്റെ ടീസർ അണിയറപ്രവർത്തകർ പുറത്തുവിട്ടിരുന്നു. കൂടാതെ ചിത്രം ഒക്ടോബർ 27-ന് ബിഗ്‌സ്‌ക്രീനിൽ എത്തുമെന്നും അണിയറപ്രവർത്തകർ പ്രഖ്യാപിച്ചു.
എയർഫോഴ്‌സ് പൈലറ്റായ തേജസ് ഗില്ലിന്റെ അസാധാരണ യാത്രയെ ആധാരമാക്കിയാണ് ചിത്രം നീങ്ങുന്നത്. ഓരോ ഇന്ത്യൻ പൗരനിലും അഭിമാനവും പ്രചോദനവും വർദ്ധിപ്പിക്കുക എന്നതാണ് ചിത്രം ലക്ഷ്യം വെയ്‌ക്കുന്നത്. 2016-ലാണ് ഇന്ത്യൻ വ്യോമസേന വനിതാ യുദ്ധവിമാന പൈലറ്റുമാരെ ഉൾപ്പെടുത്തുന്ന പദ്ധതി ആരംഭിക്കുന്നത്. 2022-ൽ ഇത് സ്ഥിര പദ്ധതിയായി നടപ്പിലാക്കി.
ആദ്യ ഘട്ടത്തിൽ മൂന്ന് വനിതാ ഫൈറ്റർ പൈലറ്റുമാരാണ് ഉണ്ടായിരുന്നത്. പിന്നീട് വർഷങ്ങൾ പിന്നിട്ടതോടെ എണ്ണം വർദ്ധിച്ചു. 2022-ൽ 16 വനിതാ പൈലറ്റുമാർ യുദ്ധവിമാനങ്ങൾ പറത്തി. ഈ ആശയം ഉൾക്കൊണ്ടാണ് ചിത്രം എത്തുന്നത്. ചിത്രത്തിന്റെ ട്രെയിലർ ഒക്ടോബർ എട്ടിന് പുറത്തിറങ്ങും.
