ന്യൂഡൽഹി: ഏഷ്യൻ ഗെയിംസിൽ ഇന്ത്യ മികച്ച പ്രകടനമാണ് കാഴ്ചവച്ചുകൊണ്ടിരിക്കുന്നതെന്ന് രാഷ്ട്രപതി ദ്രൗപദി മുർമു. ഗെയിംസിൽ ഇതുവരെയുള്ളതിൽവെച്ച് ഏറ്റവും മികച്ച പ്രകടനമാണ് രാജ്യം ഇപ്പോൾ കാഴ്ചവെച്ചിരിക്കുന്നതെന്നും രാഷ്ട്രപതി ട്വീറ്റ് ചെയ്തു.
കായികതാരങ്ങൾ രാജ്യത്തിന്റെ യശസ് ഉയർത്തികൊണ്ടിരിക്കുകയാണ്. ഏഷ്യൻ ഗെയിംസ് ചരിത്രത്തിൽ ആദ്യമായാണ് ഇന്ത്യ 80ലധികം മെഡലുകൾ നേടുന്നത്. 18 സ്വർണവും 31 വെള്ളിയും 32 വെങ്കലവുമടക്കം 81 മെഡലുകളാണ് ഗെയിംസിലെ ഇന്ത്യയുടെ സമ്പാദ്യം.
മത്സരങ്ങൾ ഇനിയും ബാക്കി നിൽക്കെ മെഡലുകളുടെ എണ്ണം ഇനിയും ഉയരാൻ സാധ്യതയുണ്ട്. 100 മെഡൽ എന്ന ലക്ഷ്യം വെച്ചാണ് ഇന്ത്യ ചൈനയിലേക്ക് പുറപ്പെട്ടത്. 1951ൽ ഏഷ്യൻ ഗെയിംസ് ആരംഭിച്ചതിന് ശേഷം 70 മെഡൽ കടക്കുന്നത് ഇന്ത്യ ആദ്യമായിട്ടാണ്. 2023 ഗെയിംസിൽ നിലവിൽ നാലാം സ്ഥാനത്താണ് ഇന്ത്യ.