മൂന്ന് വർഷത്തിനുള്ളിൽ ഓട്ടോ സെക്ടറിലേക്ക് അഞ്ച് ദശലക്ഷത്തിലധികം NavIC ചിപ്പുകൾ വിതരണം ചെയ്യാൻ കരാറിൽ ഒപ്പുവെച്ച് അക്കോർഡ് സോഫ്റ്റ വെയർ ആൻഡ് സിസ്റ്റംസ്. വരുന്ന 2-3 വർഷത്തിനുള്ളിൽ വാണിജ്യ-യാത്ര വാഹന നിർമ്മാതാക്കൾക്ക് ഇന്ത്യൻ കോൺസ്റ്റലേഷൻ ചിപ്പുകൾ നിർമ്മിച്ചു നൽകാനാണ് നീക്കം. ഏകദേശം 4-5 ദശലക്ഷത്തിൽ അധികം നാവിഗേഷൻ നൽകുമെന്ന് അക്കോർഡ് സോഫ്റ്റ്‌വെയർ ആൻഡ് സിസ്റ്റംസ് പ്രതീക്ഷിക്കുന്നതായി സിഇഒ മുരളി കൃഷ്ണ പറഞ്ഞു.
എല്ലാ വാണിജ്യ വാഹനങ്ങളിലും NavIC അധിഷ്ഠിത വാഹന ട്രാക്കിംഗ് സംവിധാനം വേണമെന്ന് സർക്കാർ ഇതിനോടകം തന്നെ നിർബന്ധമാക്കിയിട്ടുണ്ട്.സ്മാർട്ട് ഫോണുകളിലും NavIC ചിപ്‌സെറ്റുകൾ ഉപയോഗിക്കുന്നത് വൈകാതെ നിർബന്ധമാക്കും എന്നാണ് പുറത്തു വരുന്ന റിപ്പോർട്ടുകൾ. ബെംഗളൂരു ആസ്ഥാനമായി പ്രവർത്തിക്കുന്ന കമ്പനി 2024 ആദ്യം മുതൽ ഉപയോക്താക്കൾക്ക് ചിപ്പുകൾ വിതരണം ചെയ്യും. ഫാബ്രിക്കേഷൻ പങ്കാളിയായ ഗ്ലോബൽ ഫൗണ്ടറീസ് മുഖേനയാണ് ചിപ്പുകളുടെ നിർമ്മാണം പ്രഖ്യാപിച്ചിരിക്കുന്നത്.
അക്കോഡ് കമ്പനിയെ അപേക്ഷിച്ച് സ്മാർട്ട്‌ഫോണുകളേക്കാൾ ഉപരി ഓട്ടോമൊബൈൽ വ്യവസായം, ലോജിസ്റ്റിക്‌സ്, ഏവിയേഷൻ, ഡ്രോൺ മേഖലകൾ, റെയിൽവേ എന്നിവയ്‌ക്ക് ചിപ്‌സെറ്റുകളുടെ വിതരണം വരും വർഷങ്ങളിൽ വരുമാന സാദ്ധ്യത വർദ്ധിപ്പിക്കുമെന്നാണ് പ്രതീക്ഷ. ഐഎസ്ആർഒ വികസിപ്പിച്ചെടുത്ത നാവിക് ഒരു സ്വതന്ത്ര നാവിഗേഷൻ സാറ്റലൈറ്റ് സംവിധാനമാണ്. രാജ്യത്തുടനീളം ഏകദേശം 1,500 കിലോമീറ്ററോളം ഇതിന് ട്രാക്ക് ചെയ്യാൻ സാധിക്കും. ഇത് 3,000 കിലോമീറ്ററായി വർദ്ധിപ്പിക്കാനാണ് ഇസ്രോയുടെ നീക്കം.
